Быйыл 100 хаһаайыстыбаҕа сылгы базатыгар эмиэ 1-дии мөлүйүөн бэриллэр буолла
Нам улууһун Бартыһаан нэһилиэгэр Сылгыһыт күнүгэр аналлаах өрөспүүбүлүкэтээҕи тэрээһиннэр буола тураллар. Маҥнайгы күн нэһилиэк оскуолатын саҥа таас уораҕайыгар үөрэнээччилэргэ өрөспүүбүлүкэ таһымнаах научнай-практическай конференция үлэлээтэ. Күнүскү чэйтэн киэһэ сылгыһыттар, салайааччылар уонна учуонайдар кыттыылаах “төгүрүк остуолга” сылгыны үөрдээн иитиини салгыы хайдах сайыннарар туһунан санаа атастаһыытыгар 1,5 сүүсчэ киһи сырытта.
Ити гынан баран, үлэ дьоно маннык улахан түмсүүгэ аһаҕастык этиммэт үгэстээхтэр, тойотторго, үөрэхтээх дьоҥҥо сүр баттатар, толлор курдук туттааччылар. Бу даҕаны сырыыга түү мээчик наар биир өттүгэр төкүнүйдэ. Арай, бастаах өттүлэрэ (хаһаайыстыбалар салайааччылара диэн этэбин) тыл көрдөөн санааларын биллэрдилэр. Бүлүү улууһуттан “Тыымпы” ТХПК салайааччыта Вячеслав Семенов былырыын аан маҥнай ыытыллыбыт Сылгыһыт күнүн мунньаҕар сылгыһыттарга спецтаҥас туруорсубутун санатта уонна урут бөдөҥсүтүүгэ быраҕыллыбыт учаастактар, холкуостар сирдэрин сылгыны мэччитэргэ киэҥник туһанарга, оттоммут окко ханнык микроэлеменнэрэ, битэмииннэрэ тиийбэтин ветеринардарга быһаартаран, сылгыны ону учуоттаан эбии ситэрэн аһатарга, сири-уоту бобууттан хаайтарбакка өртөөн, сылгы мэччирэҥин тэринэргэ ыҥырда.
Хаҥалас улууһун Улахан Ааныгар “Бөртөтөөҕү сылгы собуота” ХЭУо базатыгар киин, илин эҥээрдээҕи улуустар сылгыһыттарыгар анаан Үөрэтэр-бэлэмниир киин тутуллан үлэлээн эрэр. ХЭУо дириэктэрэ Александр Павлов сылгыттан ылыллар бородууксуйаны толору астааһыны-таҥастааһыны саха дьоно кыайа иликтэрин этэн туран, кини хаһаайыстыбата буойуналаах астыыр-үөллүүр сыахтаммытын түмүгэр убаһаттан 68 тыһ., улахан сылгыттан 128 тыһ. солк. дохуот киллэринэр буолбуттарын холобурдаата итиэннэ бааһынайдар кыттыһан буойуналаах сыах тэринэллэригэр сүбэлээтэ. Нам улууһун II Хомустааҕар фермер Алексей Кузьмин 300-тэн тахса сылгылаах. “Биһиги убаһабытын 40 тыһ. солкуобайга батардахпытына махтал, — диэн билинэр улууска биир бастакынан тэриллибит бааһынай хаһаайыстыба баһылыга. – Мантан инньэ астааһыҥҥа-үөллээһиҥҥэ ылыстахха табыллар. Биһиги наар айылҕаҕа үүнэр бэлэм оту баһа сатыыбыт. Элбэх сыллаах окко олохтоохпут ылсарбыт эрэйиллэр буолла. Оччоҕо курааҥҥа, айылҕа кубулҕатыгар бэриниэхпит суоҕа”.
Бырабыыталыстыба бэрэссэдээтэлин бастакы солбуйааччы-тыа хаһаайыстыбатын уонна ас-үөл бэлиитикэтин миниистирэ Петр Алексеев быйыл эмиэ 100 хаһаайыстыбаҕа сылгы базатын тутууга 1-дии мөлүйүөнү биэрэр буолбуттарын мунньах кыттыылаахтарыгар иһитиннэрдэ. Нам улууһа 12 сайаапканы киллэрбититтэн 11 хаһаайыстыба ааспыт. Саамай элбэх граҥҥа Таатта хаһаайыстыбалара тиксибиттэр. Намнар – иккис көрдөрүүлээхтэр. Амма сылгыһыттара үһүс миэстэҕэ сылдьаллар. Бүгүн сарсыарда Таастаахтан Бартыһааҥҥа диэри 6 көскө сүүрдүүгэ илин былдьаһар саха аттаахтар түһүөхтэрэ. Бартыһаан ипподромугар Сындыыс кубогар икки дистанцияҕа сүүрдүү тэриллэр. Манна үрдүттэн сылгыһыттар хамаанданан күрэхтэһиэхтэрэ. Киэһэ 4 чааска Никольскайга “Күндүл” кииҥҥэ Сылгыһыт күнүгэр аналлаах тэрээһини түмүктүүр дьаһал ыытыллыа. Онно Ил Дархан Егор Борисов кэлэрин күүтэллэр.
Василий НИКИФОРОВ.