Ыраах сытар ханнык нэһилиэккэ дьаҥ тиийэ илигий?
Аллайыаха улууһун уустук суоллаах-иистээх Быйаҥныыр нэһилиэгэр 114 киһи олорор. Билиҥҥитэ бу түгэх нэһилиэккэ дьаҥ тиийэ илик. Төһө да ыраахтарын иһин, сэрэтэр-хааччахтыыр миэрэлэри тутуһаллара да көмөлөспүт буолуохтаах.
Баһылык Анастасия Ивановна Большакова этэринэн, Быйаҥныырга ким эмэ тиийдэҕинэ, дьиэтиттэн тахсыбакка олорорун ирдииллэр. Нэһилиэк дьаһалтата иһитиннэрэр-биллэрэр тэрили уулуссаҕа туруорбута көмөлөспүт. Ол көмөтүнэн харыстаныҥ, мааскалаах сылдьыҥ эҥин диэн нэһилиэнньэҕэ иһитиннэрэ олороллор.
Ол эрээри, улуус кииниттэн 200 км тэйиччи сытар нэһилиэккэ эминэн-томунан хааччыллыыга уустуктары көрсөллөр. 2018 с. “Земский доктор” бырагырааманан кэлбит биэлсэр хас биирдии ыалтан ким туох эмкэ наадыйарынан үлэх оҥорон, улуус аптекатыгар ыыппыт. Онон эмтэрэ бүгүн бураанынан кэлиэхтээх. Сорохтор эми бэйэлэрэ Чокуурдаахтан, Дьокуускайтан үлэһэн ыллараллар.
Баһылык бэлиэтииринэн, нэһилиэк дьаһалтата “Саханефтегазсбыт” тэрилтэни кытта дуогабардаһан, таараламмыт уматыгынан хааччыллар буолбуттара түөрт сыл буолбут. Хамсык кэмигэр бу олохтоохтору олус абыраабыт. Онтон атын эр дьон бураанынан улуус кииниттэн уматык ыла баран, оччоҕо дьаҥҥа сыстыы тахсыа этэ диир. Уонна биир өттүнэн уматыгы маннык тиэрдии дьиэ кэргэн бүддьүөтүгэр кэмчилээһини таһаарбыт. Тоҕо диэтэххэ, бензин ылаары Чокурдаахха төттөрү-таары тиэстиигэ элбэх уматыгы бурааннарыгар үрдэриэ этилэр.
Түөрт кылаастаах оскуола оҕолоро төрөппүттэр быһаарыыларынан билигин оскуолаҕа үөрэнэ сылдьаллар.
Тэйиччи сытар хоту нэһилиэккэ аһынан-үөлүнэн хааччыллыы уустуга биллэр. “Саҥа дьыл саҕана Чокуурдаахха бородуукталыы барыахтарын сөп, дьэ, ол дьаҥ кэмигэр олус кутталлаах”, — диир баһылык. Онон “Күөх рейс” кэлэрин эрэнэ кэтэһэллэр. Итинник араас миэрэлэр көмөлөрүнэн Быйаҥныырга дьаҥ тиийбэтин туһугар үлэни тэрийэллэр.
Бэлэмнээтэ Женни Стрюкова
Хаартыска: олохтоох дьаһалта тиксэриитэ