Бүгүҥҥүттэн саха артыыстара уһуллубут «Чужая» киинэ Арассыыйаҕа көстүөҕэ
Балаҕан ыйын 28 күнүттэн Алексей Луканёв режиссердаах «Чужая» диэн киинэ Арассыыйа бары киинэ тыйаатырдарыгар көстүөҕэ.
Бу киинэни Саха сиригэр Москваттан кэлэн устубуттара. Оруолларга саха артыыстара оонньообуттара: Ньургун Бэчигэн, Зоя Багынанова, Айыына Слепцова, Георгий Бессонов, Ильяна Павлова уо.д.а.
Саха тыйаатырын артыыһа Ильяна Павлова киинэҕэ уһуллубутун туһунан СИА-ҕа маннык кэпсээбит: «Бу киинэни Саха сиригэр устубуттара. Режиссерунан уонна операторынан Алексей Луканев бэйэтэ үлэлээбитэ. Икки сыллааҕыта Москваттан киинэ устуудьуйата Дьокуускайга кэлэн кастинг оҥорон барбыта. Онно Үүнэр көлүөнэ тыйаатырын уонна Саха тыйаатырын артыыстара талыллыбыттара. Үксүн Кангаласс хайатыгар устубуппут. Мин биир сүрүн оруолу толорбутум. Киинэҕэ биһиги сахалыы саҥарбыппыт, ону үрдүттэн атын тылы туруоран биэрбиттэр эбит».