Матвей диэн Жатайга олорор биир сааһын да туола илик кырачаан былырыын АКДС быһыытын ылан баран, ыарыһах оҕоҕо кубулуйбутун уонна эмчиттэр аахайымтыата суох быһыыларын туһунан суруйуу социальнай ситимнэргэ киэҥник тарҕанна.
Манна кырачаан киһи быһыы ылан баран, кыраадыһа тахсыбытыгар «суһал көмө» кэлэ охсубатаҕын, ол түмүгэр Медицина национальнай киинигэр реанимация отделениетыгар киирэр дьылҕаламмытын, билигин кини ыарыһах оҕоҕо кубулуйбутун туһунан кэпсэнэр. Бу дууһа кыланыытын аахпыт эрэ киһи, чуолаан эдэр ийэлэр, долгуйаллара саарбаҕа суох. Чэгиэн-чэбдик доруобуйалаах, ийэлээх-аҕатын үөрдэ-көтүтэ сылдьыбыт кырачаан аныгы медицина сайдыбыт үйэтигэр биир быһыыттан тоҕо эмсэҕэлиэхтээҕий?!
СӨ Доруобуйа харыстабылын министиэристибэтин иһинэн Дьокуускай к. доруобуйа харыстабылын управлениетын салайааччы Лена Афанасьева маннык быһаарда:
– Интернет-сайтарга суруллубут түбэлтэ төрөппүттэргэ эрэ буолбакка, эмчиттэргэ эмиэ улахан алдьархай. Хас биирдии оҕо олоҕо улахан суолталаах! Оҕолорго быһыыны биэрии боппуруоһун сүрүннүүр учуонайдар, быраастар уонна төрөппүттэр куруук актыыбынайдык дьүүллэһэллэр. Үксүгэр үгүс төрөппүт оҕо доруобуйатыгар наадалаах быһыы суолтатын өйдөөбөт.
АКДС – аан дойдуга саамай киэҥник тарҕаммыт быһыы. Бу быһыы сыл аайы мөлүйүөнүнэн ахсааннаах оҕону дифтерия, столбняк (тартаран ыалдьар сыстыганнаах ыарыы) уонна коклюш (иэрийэр сөтөл) курдук өлүүгэ тириэрдиэн сөптөөх кутталлаах ыарыылартан харыстыыр. Биһиги кэммитигэр быһыы маассабайдык ыытыллар буолан, бу ыарыылар сыыйа-баайа умнулуннулар. Ааспыт үйэ 40-50 сылларыгар АКДС быһыы айыллыар диэри Арассыыйа оҕолорун 20 бырыһыана дифтериянан ыалдьара (аҥаардара өлөрө), тартаран ыалдьыбыт оҕо 95% кыайан быыһаммата, оҕолор 100% иэрийэр сөтөлтөн эрэйдэнэрэ. Оттон быһыы көдьүүһэ элбэх. 100000 оҕоттон биир эмэ оҕо быһыы компоненнарын тулуйбата баар буолар.
Кэтээн көрөр уорганнар, СӨ Доруобуйа харыстабылын министиэристибэтэ, Дьокуускай к. доруобуйа харыстабылын управлениета бу түбэлтэҕэ эмчиттэр дьайыыларын бэрэбиэркэлээтилэр уонна ханнык да кэһиини булбатылар. Ол гынан баран, билигин түмүк оҥоһуллар кыаҕа суох. Тоҕо диэтэххэ, бу быһыы-майгы олус ыарахан түбэлтэргэ киирсэр уонна оҕо быһыыттан ылбыт содулун биричиинэтин быһаарарга үлэ барар.
Онтон доруобуйа харыстабылын үлэһиттэрэ кырачаан киһини эмтииргэ уонна доруобуйатын чөлүгэр түһэрэргэ биир кэлим дьаһаллары ылаллар.
Надежда ЕГОРОВА, edersaas.ru