Дьаҥҥа хаптарыы син аччаабыт, оттон быһыыны ылыы хайдаҕый?
Бүгүн Ольга Балабкина уочараттаах брифинин ыытта. Өрөспүүбүлүкэҕэ хамсыгы бохсууга суһал ыстаап салайааччытын солбуйааччы этэринэн, 50 киһи ыалдьыбыта биллибит. Роспотребнадзор Саха сиринээҕи управлениетын чахчытынан, Ити иһиттэн Дьокуускайга –31, Мииринэйгэ –5 киһи дьаҥҥа хаптарбыт буоллаҕына, атын 10 оройуоҥҥа бииртэн үскэ диэри киһи ыалдьыбыта бэлиэтэммит. Ол эбэтэр 14 муниципальнай тэриллии сиригэр-уотугар олорор дьоҥҥо коронавирус дьаҥа суоһуур. Бэҕэһээ төһө даҕаны бырааһынньык күн буоллар, лабораториялар кыраапыгынан үлэлээбиттэр. Ол курдук, 742 чинчийии оҥоһуллубут.
Билиҥҥи туругунан 44 мэдиссиинэ тэрилтэтигэр быһыыны биэрии ыытыллар. 110 дьоҕус биригээдэлэр тэриллибиттэр. Быһыыны ылар туһугар олорор сиргитинэн суруйтарыҥ диэтэ Ольга Балабкина. Кини бэлиэтииринэн, Дьокуускайга, Бүлүүгэ, Мэҥэ Хаҥаласка, Уус Алдаҥҥа, Алдаҥҥа быһыыны биэрии тэтимнээхтик бара турар буоллаҕына, Үөһээ Бүлүүгэ, Ньурбаҕа, Чурапчыга, Сунтаарга, Горнайга быһыыны ылыы бытаан.
Ыстаап салайааччытын солбуйааччы маны сэргэ бүгүн өрөспүүбүлүкэ Ил Дархана Дьокуускай куорат мэдиссиинэ тэрилтэлэригэр сылдьыбытын эттэ. Уонна култуура тэрилтэлэрэ маассабай тэрээһиннэри ыытыы ирдэбиллэрин тутуһалларыгар сүбэлээтэ.
Ыарыы төһө да аччаабыт курдугун иһин, бары ирдэбиллэри тутуһарбыт ирдэнэр.
Бэлэмнээтэ Женни Стрюкова
Хаартыска: саайтан