Дьокуускай куорат 3-с №-дээх балыыһатын быһыы биэрэр пууннарыгар вакцинаны ылбыт дьон коронавируснай инфекцияттан көмүскэнэр сириэстибэлэри бэлэх тутуохтара.
Дьокуускай куорат 3-с №-дээх балыыһатын быһыы биэрэр мобильнай пууннара “Проспект” атыы-эргиэн дьиэтигэр (Курашов уулуссатын 6-с №-рэ), “Азия” эргиэн-аралдьытар кииҥҥэ (Чернышевскай уул., 74/8), Опера, балет тыйаатырыгар (Ленин проспега, 46/1), Эстрада тыйаатырыгар (Ленин проспега, 47), “Мин докумуоннарым” кииҥҥэ (Аммосов уул., 18) үлэлииллэр. Манна эрдэттэн суруйтарыыта суох, уочараттаан киирэллэр. Пааспары, полиһы уонна СНИЛС-ы илдьэ бараҕыт.
Дьиэттэн кыайан тахсыбат дьон дьиэлэригэр биригээдэни ыҥыран, быһыыны ылыахтарын сөп. Онуоха 8800-200-5454 уонна 506-421 нүөмэрдэринэн эрийэҕит.
Ону тэҥэ, коронавируснай инфекцияны утары быһыыны ылбыттарга Дьокуускай куорат 3-с №-дээх балыыһата мэдиссиинэ чинчийиилэригэр бириистэри оонньотор. Бириистэрэ – МРТ, уорганнары түһэрэр УЗИ, иммуноглобулиннары быһаарарга анаалыһы тутуу, маммография, Д битэмиин таһымын быһаарыы, о.д.а.
Ону тэҥэ, ыам ыйын 20 күнүгэр Эстрада тыйаатырыгар тиийэн, 30 бастакы ылбыт дьоҥҥо “Эстрада 21” кэниэргэ, эбэтэр саҥа тахсар “Мааппа” испэктээкилгэ билиэттэри бэлэхтиэхтэрэ.
Ангелина Васильева, “Саха сирэ” хаһыат, edersaas.ru