Доруобуйа харыстабылын миниистирэ Елена Борисова коронавируһу утары быһыыны хайдах ылар туһунан брифинг кэмигэр кэпсээтэ.
Өрөспүүбүлүкэҕэ 5 тыһыынча устуука быһыы кэлэн, сүрүннээн миэдиктэргэ бэриллибитэ. Бу күннэргэ 22 тыһыынча устуука кэлэн, улуустарга тарҕатыллыаҕа. Олунньу бүтүөр диэри 69,5 тыһыынча устуука кэлэрэ күүтүллэр.
Үлэ кэлэктииптэрэ тэрилтэлэригэр ылыахтарын баҕарар буоллахтарына, салайааччылара анал дуогабар түһэрсиэхтээхтэр. Үлэлээбэт дьон эмиэ ылыахтарын сөп: олорор сирдэринэн сыһыарыллыбыт поликлиникаларыгар эрийэн, суруйтарыахтарын сөп. Министиэристибэҕэ “Госуслуги” портал нөҥүө суруйтарар мэхэньиисими оҥоро сылдьаллар.
Суруйтаран баран, ыйыллыбыт бириэмэҕэ кэлэн, терапевт бырааска көрдөрөҕүн, анкета толороҕун, сөбүлэҥҥэ илии баттыыгын. 21 хонон баран, иккис быһыыгын ылаҕын. “Госуслуги” порталга “Бэйэни кэтэнэн көрүү күннүгүн” толоруохтааххын. Иккис быһыы кэнниттэн бу порталтан сэртипикээккин ылаҕын.
— Вакцина көдьүүһэ иккистээн биэрии кэнниттэн 20 хонон баран көстөн барар. Ол гынан баран, бу кэм иннинэ уонна кэнниттэн да, мааскаҕытын устубаккытыгар сүбэлиэ этибит. Тоҕо диэтэр, атын инфекциялартан бэйэҕитин харыстанаҕыт, ону тэҥэ, быһыыны ылбыт да киһи вируһу биллэрбэккэ илдьэ сылдьыан сөп (носитель), онон атын дьону харыстыыр туһуттан, маасканы кэтэ сылдьыҥ, — диэн миниистир тоһоҕолоон бэлиэтээтэ.
Санатар буоллахха, РФ доруобуйаҕа харыстабылын миниистирэ Михаил Мурашко эмиэ бу туһунан этэн турар.
Ангелина Васильева, “Саха сирэ” хаһыат, edersaas.ru
Хаартыска: интэриниэттэн.