Доруобуйа Маны аах

Быһыыны туруорар хампаанньалар үлэлэрин күүһүрдүөхтэрэ

СӨ Ил Дархана Айсен Николаев улуус баһылыктарыгар коронавирус утары быһыыны биэрэр хампаанньалар үлэлэрин күүһүрдэллэригэр соруйда.

Ыам ыйын 18 күнүнээҕи туругунан өрөспүүбүлүкэҕэ 108 киһи коронавируска сутуллубута быһаарыллыбыт. Ол иһигэр Дьокуускайга – 70. Сэттэ оройуоҥҥа ыалдьыы саҥа түгэннэрэ бэлиэтэннилэр. Өрөспүүбүлүкэҕэ хаһыс да нэдиэлэтин коронавируска сутуллуу ахсаанын таһыма уларыйбат. Ил Дархан Айсен Николаев эпидемиологическай балаһыанньанан ыытыллыбыт мунньахха улуустар уонна куорат уокуруктарын баһылыктарыгар бу туһунан иһитиннэрдэ.
Коронавирус дьаҥар сутуллуу ордук Дьокуускай куоракка (60%-тан тахса) улахан, маны сэргэ уустук быһыы-майгы Мэҥэ Хаҥалас улууһугар бэлиэтэнэр. СӨ Роспотребнадзор управлениетын иһитиннэриитинэн,  Уус Алдаҥҥа, Бүлүүгэ, Тааттаҕа, Чурапчыга, Хаҥаласка, Кэбээйигэ коронавирустааччы ахсаана элбээбит. Верхоянскайга уонна Эдьигээҥҥэ COVID-19 ыалдьыы саҥа түбэлтэтэ тахсыбыта дьиксиннэрэр.
Өрөспүүбүлүкэҕэ ыараханнык ыалдьыбыттар ахсааннара элбээбит, ыарыыттан сылтаан 18-40 саастаах эдэр дьон олохтон барыылара чаастатыйбыт. Билиҥҥи туругунан балыыһаларга реанимация салааларыгар 60 пациент баар, итиннэ 14 киһи ИВЛ аппараатыгар холбонон сытар.
Эпидемиологическай быһыыны-майгыны тосту уларытар туһуттан, быһыыны туруорар хампаанньалар үлэлэрин тэтимирдэллэригэр улуустар баһылыктарыгар сорудахтанна. Оттон СӨ суһал ыстааба Дьокуускайга уонна Мэҥэ Хаҥаласка маассабай вакцинациялааһын ыытылларын биллэрбитигэр,  үлэлиир дьоҥҥо уонна кырдьаҕастарга, 70%-тан итэҕэһэ суох, кылгас болдьоххо быһыы бэриллиэхтээҕэр сорук туруоруллубута. Ол инниттэн, быһыыны туруорарга эбии пууннар арыллаллар.
Өрөспүүбүлүкэ улуустарын нэһилиэктэргэ мобильнай биригээдэлэри тэрийэн таһаарыыны хааччыйарга сорудах бэриллибитэ. Маныаха мэдиссиинэ үлэһиттэрин сайаапкаларынан олохтоох дьаһалталар тырааныспарынан хааччыйыы боппуруоһун быһаарар эбээһинэстээхтэр.
Өссө биир соругунан  муниципальнай тэриллиилэр, тэрилтэлэр үлэһиттэригэр, нэһилиэнньэни кытары сибээстээх үлэлээхтэргэ, командировкаҕа сылдьар дьоҥҥо  быһыыны туруорар туһунан этиллэр. Өрөспүүбүлүкэ улуустарыгар тиийэр дьоҥҥо, ол иһигэр баахта үлэһиттэригэр уонна тутуу биригээдэлэригэр хонтуруол мөлтүө суохтаах.
Мунньахха коронавируһу бохсууга ылыллар миэрэлэр тустарынан миэстэтигэр туох үлэлэр ыытыллалларын уонна нэһилиэнньэҕэ быһыыны оҥоруу туһунан Өймөкөөн, Хаҥалас, Кэбээйи улуустарын баһылыктара иһитиннэрдилэр.
Айсен Николаев кутталлаах дьаҥы утары охсуһарга нэһилиэнньэ маассабай вакцинацияланыыта көдьүүстээх буоларын бэлиэтээн эттэ. Бу туһуттан улуустар уонна куорат уокуруктарын баһылыктара бэйэлэринэн дьон-сэргэ быһыыны ыларын көҕүлүөхтээхтэрэ, нэһилиэнньэҕэ иһитиннэрэр-быһаарар үлэ киэҥник тарҕатыллыахтааҕа этилиннэ. «Кутталлаах ыарыыттан харыстанарга вакцинация көдьүүстээҕин туһунан дьон өйдүүрүн курдук быһаарар наада», — диэтэ Ил Дархан.
Сайыҥҥы сынньалаҥнар саҕаланаары туралларынан, эмиэ былырыыҥҥы курдук, улууска сынньана тиийбит  оҕолору мэдиссиинэ өртүттэн кэтээн көрүү уонна учуот хайаан да ыытылларыгар бэлэмнэнии барыахтааҕын туһунан улуустар баһылыктарыгар тоһоҕолоон этилиннэ. Маны сэргэ,  бары тэрилтэлэргэ, организацияларга, уопсастыбаннай сирдэргэ санитарнай-эпидемиологическай ирдэбили тутуһуу  хайаан да күүһүрүөхтээҕэ ыйылынна.
0
0