«Быһыы-майгы уустугурда. Холкутуйар табыллыбат»

Санатан эттэххэ, Саха сирин үрдүнэн бүтэһик хонукка 107 киһи хоруона хамсыгар ыалдьыбыта билиннэ. Өрөспүүбүлүкэ салалтата бу дьаҥы тохтотор туһуттан миэрэлэри ыларын туһунан бүгүн, алтынньы 9 күнүгэр, суһал ыстаап мунньаҕар көрүлүннэ.

Өрөспүүбүлүкэҕэ 107 киһи коронавирустаабытыттан, Дьокуускайга 70 киһи ыалдьыбыт. Амма, Мииринэй оройуоннарыгар — биэстии, Алдаҥҥа, Хаҥаласка, Чурапчыга — түөртүү, Уус Алдаҥҥа — 3,  Бүлүү, Горнай, Нерюнгри, Өлүөхүмэ, Таатта оройуоннарыгар — иккилии, Намҥа уонна Өлөөҥҥө биирдии киһи ыалдьыбыт.

«Саамай кутталлаах быһыы-майгы Дьокуускайга. Манна куойка 86-87% толору турар. Ыарахан ыарыһахтар ахсааннара элбэҕэ улаханнык долгутар. Бүгүн күҥҥэ 58 киһи ыарахан туруктаах. Итинтэн 17 киһи ИВЛ аппараатыгар холбонон сытар. Быһыы-майгы уустук, кыратык да холкутуйар табыллыбат. Биһиги коронавирус дьаҥа тарҕаныытын тохтотуох тустаахпыт. Ыарыһахтарга болҕомто ууруллуохтаах, үрдүк таһымҥа хаачыстыбалаахтык эмтэнэллэин хааччыйыахтаахпыт. Бу уустук быһыыны-майгыны тохтото охсорго турунуоҕуҥ, — диэтэ Ил Дархан Айсен Николаев.

Кини куойкалары, ол иһигэр, кислородунан тыынар ыарахан ыарыһахтарга элбэтэри ыйда. Ылыллар миэрэлэргэ , чугастааҕы кэмнэргэ, ОРВИ уонна кириип ыарыыларын утары быһыылары оҥорорго, хааччахтыыр миэрэлэри кэһиилэри хонтуруоллуур тэрээһиннэри, өйдөтөр-сүбэлиир үлэлэри күүһүрдэргэ, ханна да булгуччу мааскалаах сылдьыыны хонтуруоллууру улаатыннарарга соруйда.

«Ханна баҕарар мааскалаах сылдьыы кытаанахтык тутуһуллуохтаах. Сир аайы кыраадыһы мээрэйдээһин уонна дезинфекция үлэлэрэ ыытыллыахтаахтар. Кэтиир-хонтуруоллуур структуралар үлэлэрин күүһүрдүөхтэрэ. Куораттарга уонна оройуоннарга эбии миэрэлэр ылыллыыларын көрөрбүт наада», — диэн бэлиэтээтэ.

Дьокуускай баһылыга Сардаана Авксентьева урукку хааччахтааһыннары, ол иһигэр түүҥҥү кулууптар, баардар үлэлэригэр, киллэрэри, санитарнай үлэни тиһиктээхтик ыытары эттэ. Салгыы Айсен Николаев этиилэри өрөспүүбүлүкэ суһал ыстааптарыгар ыытарга соруйда.

Ил Дархан коронавирус анаалыһын боппуруоһугар туспа тохтоото. Өрөспүүбүлүкэҕэ биир күҥҥэ 5 тыһыынча тест оҥоһуллар. «Тест оҥоруутугар Саха сирэ дойдуга бастыҥ үлэлээҕинэн биллэр. 100 тыһыынчалаах нэһилиэнньэҕэ 382 тэҥ, нэдиэлэ бүтүүтэ көрдөрүү өссө улаатыа. Бу көрдөрүү дойдуга ортотунан 100 тыһыынчаҕа 150-ҥа тэҥ, сорох эрэгийиэннэр итиннэ тиийбэттэр», — диэтэ.

Төһө да элбэх тест оҥоһуллубутун иһин, лабораториялар наһаа ноҕоруускалаахтарын, сороҕор дьон анаалыстарын түмүгүн нэдиэлэ күүтэллэрин эттэ. Итиннэ даҕатан, кини анаалыһы быраас ыйыытынан эрэ туттарар наадатын тоһоҕолоото. «Сороҕор, биһиги бэйэбит баҕабытынан тиийэн анаалыс туттараммыт,  лабораторияларбыт үлэлэрин эбии ноҕоруускалыыбыт. Сорох күннэргэ, тест 40%-на наадалаах дьон анаалыһын быһаарыыга буолбакка, доруобай дьон анаалыстарын көрүүгэ ананар. Оннук буолуо суохтаах. Анаалыһы быраас эрэ ыйыытынан туттарыҥ», — диэн  Айсен Николаев эбэн эттэ.

Өрөспүүбүлүкэ Аҕа баһылыга маны сэргэ, баахта бөһүөлэктэригэр куттал суох буолуутун хааччыйыыны күүһүрдэргэ уонна эминэн-томунан хааччылыы боппуруоһун хонтуруолга тутан олорорго сорудахтаата.