Доруобуйа

“Быһыы көмөтүнэн эрэ аан дойду дьоно үгүс ыарыыны мүччү көппүтэ”

Коронавирус дьаҥа өрө туруоҕуттан лоп курдук икки сыл ааста. Бу кэм тухары хас биирдии дойду барыта нэһилиэнньэтин өрүһүйэр туһугар өрө мөхсөр, быһыы айар. Ол эрээри, быһыыны ыларын-ылбатын дьон бэйэтэ быһаарынар.

edersaas.ru

А.Е.Кулаковскай-Өксөкүлээх Өлөксөй аатынан Норуоттар доҕордоһууларын дьиэтин генеральнай дириэктэрин омуктар икки ардыларынааҕы үлэҕэ бастакы солбуйааччыта Александр Колесов:

— Коронавирустан быһыыны аан дойду дьоно барыта ылар. Туһалаах диэн эрэнэн туруортаран эрдэхпит. Көдьүүһэ суоҕа буоллар бахсыынаны букатын даҕаны оҥоруо суох, таблетканан эмтээбиттэрин курдук эмтии сылдьыах этилэр дии саныыбын. Бахсыына баар буолан урут-уруккуттан уоспа, чумаа, кириип курдук онтон да атын элбэх ыарыыны, дьаҥы мүччү түһэн кэллэхпит. Оҕо эрдэхпитинэ “прививкэ” диэн ааттаан араас ыарыыттан бары быһыыны ыларбыт. Коронавирустан быһыыны эмиэ ити курдук толкуйдаан ылар ордук.

Биһиги дьону-сэргэни кытта үгүстүк алтыһарбыт быһыытынан, бэйэбитин уонна Норуоттар доҕордоһууларын дьиэтигэр кэлэр дьону харыстыах, ыарыыны тарҕатымыах тустаахпыт. Тус бэйэм быһыыны балаҕан ыйын саҥатыгар ылбытым, ол иннинэ ыалдьа сылдьыбытым. Тэрилтэбит үлэһитин 90-тан тахса бырыһыана бары бахсыынаны туруортарбыппыт. Аҕыйах киһи коронавирустуу сылдьыбыт буолан “куйаар-кодтаах”. Быһыыны ылартан аккаастаммыт киһи диэн суох. Нэһилиэнньэни эмиэ бу дьаҥтан харыстыыр соҕотох ньыманы – быһыыны ылан харыстаналларыгар ыҥырабыт, — диэн санаатын үллэһиннэ.

Манна даҕатан эттэххэ, СӨ Ил Дарханын ыйааҕар олоҕуран, култуура, атыы-эргиэн, дьону аһатар, о.д.а. тэрилтэлэргэ коронавирус дьаҕын утары быһыыны ылбыты туоһулуур “куйаар-кодунан” киллэрэллэр. Салайааччы Өксөкүлээх Өлөксөй аатынан Норуоттар доҕордоһууларын дьиэтэ тустаах дьаһалы тутуһар. Кэнсиэргэ, киинэҕэ кэлэр дьон үксэ кодтааҕын, нэһилиэнньэ өйдүүрүн, аҕыйах киһи сөпсөспөтүн биллэрэрин этэр.

 

Людмила ПОПОВА, “Саха сирэ” хаһыат, edersaas.ru

0
0
Telegram @edersaas20