Күннэтэ тэлэбиисэргэ, сериалларга көрө үөрэммит араас быһылааннарбыт ханна эрэ ыраах буолалларын курдук саныыбыт. Оттон дьиҥэр, итинник, киһи олоҕор кутталлаах түбэлтэлэр, букатын бэйэбит аттыбытыгар тахса тураллар.
Вера МАКАРОВА, «Саха сирэ» хаһыат, https://edersaas.ru/
Ол курдук, 2016 сыл балаҕан ыйыгар Нерюнгри куоракка А. диэн киһи эрдэттэн оҥостон-тэринэн, анаан-минээн талыы-халыы диэн «бултаһа» тахсыбыт. Маныаха биир ас-үөл маҕаһыыныттан В. диэн дьахтар күннээҕи киирбит харчыны сарсыарда аайы кэлэн ыларын билэр буолан, кинини хаһан тахсарын кэтээн, кэтэһэн турбут.
Сарсыарда 9.30 мүн. саҕана дьахтар маҕаһыынтан тахсан, массыынатыгар олороотун кытта, талабырдьыт кэлин олбоххо олоро биэрээт, быһаҕынан тирээн туран, харчытын көрдөөбүт.
Дьахтар массыынатыттан ойон тахсаат, атахха биллэрбит эрээри, эдэр киһи быһыйа бэрт буолан, ситиэхчэ буолбутугар, харчылаах суумкатын сиргэ кыыратан кэбиспит. 86 тыһ. солк. симиллэ сылдьар суумкатын талабырдьыт харбаан ылаат, «бултуйбутун» «бырааһынньыктыы» барбыт, ити өлгөм харчыны талбытынан бараабыт.
Аны сэтинньи ыйга харчыта суох хаалан баран, эмиэ талыы барарга санаммыт. Бу сырыыга маҕаһыыҥҥа киирэн, соҕотох турар атыылааччыны быһаҕынан тирээн туран, каассаттан 70 тыһ. солк. баарын ылан тахсыбыт.
Бу талабырдьыт холуобунай дьыалата суут мунньаҕар көрүллэн, ити икки буруйун иһин 3 сыл 6 ыйга кытаанах режимнээх холуонньаҕа көҥүлэ быһылларга ууруллубут.
Бу туһунан СӨ Борокуратууратын пресс-сулууспата иһитиннэрдэ.
Вера МАКАРОВА, «Саха сирэ» хаһыат, https://edersaas.ru/
Хаартыска: интернет.