Бүгүн киэһэ өрөспүүбүлүкэ Ил Дархана социальнай ситимнэринэн быһа сибээскэ тахсан, 1 чаас кэриҥэ ыйытыыларга хоруйдаата. Биллэн турар, үгүс киһини коронавирус дьаҥа долгутар. Ол ыйытыылартан даҕаны көстөр.
— Мин быһыыны ылбытым. Төрөппүттэрим эмиэ. Аҕабар антитела үөскээтэ. Бары хааччахтааһыннары тутуһуохтаахпыт. Саха Өрөспүүбүлүкэтин балаһыанньатын ыллахха, көрдөрүү үчүгэй. Быһыы баар. Маркировканы барыыта уустук тиһик. Бары оройуоннарга суол хаалыан иннинэ баттаһа ыытабыт, — диэн саҕалаата кэпсэтиини Айсен Николаев.
— 65 саастарыттан үөһээ дьон хаһан үлэҕэ тахсалларый?
— Билигин 65+саастаахтарга хааччахтааһын тутуһуллар. Федеральнай оперативнай ыстаап уһулуҥ диэтэҕинэ, көҥүллүөхпүт.
— Биэнсийэлээхтэргэ хаһан төлөбүрү биэриэхтэрэй?
— Дьаҥ тохтоотоҕуна.
— Харантыын хаһан тохтуоҕай?
— Ыарыы олоччу сүттэҕинэ. Дьиҥэ, хааччахтыыр миэрэлэртэн олох дуона суохтар хааллылар. Доруобуйа харыстабылын эйгэтэ сөптөөх эрэсииминэн үлэлиир.
— Нерюнгри оройуонун Серебрянай Боругар, Дьокуускайга ыт элбээтэ. Ленскэйгэ ыттары оҕолор көрөллөрүгэр өлөрбүттэрэ сөптөөх дуо?
— Ыттары тутууга цивилизованнайдык сыһыаннаһыахха.
— Ыһыах буолар дуо?
— Ыһыахтыахпыт. Олус уустук хааччах буолбат ини диэн эрэнэбин.
— Өлүөнэ муостатын туһунан тугу этиэххиний?
— Муоста боппуруоһунан үлэ бара турар. Соторутааҕыта Хуснуллин РФ бырайыагы үбүлээһиҥҥэ кыттыаҕа диэбитэ. Муоста тутуллара наада диэн бары өйдүүбүт. Бырайыагынан быһаарыы торумнанна. Чугастааҕы ыйдарга үбүлээһинигэр быһаарыы ылыныллыаҕа.
— Муниципалитеттар сааскы халааҥҥа бэлэмнэр дуо?
— Бэлэмнэнии үрдүк буолуохтаах уонна күн-дьыл табыгастаах буолуо диэн эрэнэбит. Муниципалитеттар эрэ буолбакка, бары бэлэм буолуохтаахпыт.
— Авиабилет сыаната олус ыарахан дии.
— Кырдьык, олус уустук кыһалҕа. Бырабыыталыстыба таһымыгар чэпчэтиилэри көрөр ньымалары толкуйдуулларыгар сорудахтаабыппыт. Чуолаан, олохтоох, иһинээҕи рейстэргэ. Дьокуускайтан Хонууга көтүү Москваҕа көтөрдөөҕөр ыарахан.
— Ас-үөл сыаната тоҕо үс төгүл үрдээтэ?
— 2-3 төгүл үрдүү илик.
— Баһаартан бэлэмнээх буолуу туруга хайдаҕый?
— Биһиги баһаары утары икки хайысханан үлэлиир соруктаахпыт. Бастакытынан, федеральнай үбүлээһини улаатыннарыыны ситиһэргэ. Иккиһинэн, өрөспүүбүлүкэҕэ анал бөлөхтөрү тэрийиини күүһүрдэргэ. Холобур, Арктикаҕа Баатаҕайга кииннээн тэрийдибит. Кэнники сылларга Арктикаҕа ойуур уота элбээтэ.
Бэлэмнээтэ Женни Стрюкова
Хаартыска: сахагов