СӨ Ил Дархана олох-дьаһах араас эйгэтигэр үгүс ыйытыыларга хоруйдаата. Дьон быһаччы ыйытар. Тымныы кыһыны, кыстыгы этэҥҥэ туораан иһэрбит ыйытыылартан да көһүннэ. Дьону буолаары турар сааскы бырааһынньыктар кытта долгуталлар.
— Муус устар 3 күнүттэн харантыыҥҥа олордоҕут дуо?
— Оннук былаан суох. Ковид дьаҥа сыыйа аччаата.
— Балыыһаҕа сорох исписэлиистэргэ көрдөрөргө саайтара хаһан үлэлиирий?
— Эмп тэрилтэлэрэ кыраапыгынан үлэлии тураллар. Саайтара үлэлээбит буолуохтаах.
— Хатаска оҕо успуордун оскуолата тутуллуо дуо?
— Арааһа, Хатаска успуорт саалатын тутууну этэҕит быһыылаах. Кырдьык, успуорт саалата тутуллуоҕа, үлэтэ саҕаланыаҕа.
— Өлөчөйгө гаас киириэ дуо?
— Өлөчөй испииһэккэ хапсыбыта.
— Ыам ыйын 1 күнүгэр сэлэлээн хаамабыт дуу?
— Параады булгуччу ыытыахпыт. Билиҥҥитэ эпидбалаһыанньа тупсан иһэр.
— Оттон Өрөспүүбүлүкэ күнэ буолар дуу?
— Бэлиэтиэхпит. Хайдах ыытары быһаарыахпыт. Ол туспа боппуруос.
— Быһыы ылбатаххына үлэҕиттэн ууратыахтара дииллэр.
— Ууратар сыыһа.
— Кырдьаҕастар дьиэлэригэр харантыыны тоҕо уһуллулар?
— Эпидбалаһыанньа устарга кыаҕы биэрэр.
— Соцситимнэринэн улуустар баһылыктара ыйытыыларга хоруйдууллара буоллар.
— Эһиги баһылыктаргыт. Кытталларын ирдээҥ ээ.
— Саамай ааҕар эрэгийиэн диэн ааттанныбыт. Бибилэтиэкэлэр тустарынан тугу этиэҥ этэй?
— Бибилэтиэкэлэри өйүүбүн. Ол эрээри аныгылыы буолуохтаахтар, урукку курдук кинигэ эрэ уларсан барыы буолбакка.
— Бэйэҕэр табыгастаах эрэ ыйытыыларга хоруйдуугун дуу?
— Барытыгар хоруйдуу сатаатым.
Дьэ, ити курдук, биир чаас устата Айсен Сергеевич баһаам ыйытыыга хоруйдаата. Дьаҥ-дьаһах дьалбарыйан, ыарыы аччаан иһэрин истэн, үгүстэр уоскуйдахтара. Түмүгэр Айсен Николаев барыбытыгар чэгиэн доруобуйаны, этэҥҥэ буолууну баҕарда.
Бэлэмнээтэ Женни Стрюкова
Хаартыска: сахагов