Быһа эпииргэ кэбээйилэргэ уонна дьааҥыларга көмөлөстүлэр

Ааптар: 
Бөлөххө киир:

Бэҕэһээ “Саха” НКИК халаан уутуттан эмсэҕэлээбит оройуоннарга көмөлөһөр марафону — аһымал аахсыйатын биллэрбитэ. Дьон-сэргэ айылҕа иэдээнигэр түбэспит Кэбээйи уонна Дьааҥы нэһилиэктэригэр көмөлөрүн ууммуттара. Бу иннинэ “Эдэр саас” сайтка “Суордаахтарга көмөлөһүҥ!” диэн реквизиттээх ыҥырыыны таһаарбыппытын эмиэ дьон сүрдээҕин аахпыта, онон бэйэлэрин көмөлөрүн киллэрбиттэрэ эрэбил.

Үтүө санаалаах биир дойдулаахтарбыт, кыахтаах тэрилтэлэр ууга барбыт нэһилиэктэр олохтоохторо дьиэлэрин-уоттарын, хаһаайыстыбаларын бэринэн, куурдан, этэҥҥэ кыстыкка киирэллэрин туһугар 3 796 000 солкуобай үбүнэн-харчынан көмөлөспүттэрин туһунан тэрийээччилэр этэллэр. Онон “Норуот күүһэ – көмүөл күүһэ” диэн мээнэҕэ этиллибэт эбит.

Үтүө санааланыы марафонун туһунан Саха сирин олохтоохторо бары кэрэхсээн көрөр ыытааччыбыт, телевидение дириэктэрэ Олег Колесов-Талбан маннык санаатын үллэһиннэ:

— “Саха” национальнай көрдөрөр-иһитиннэрэр хампаанньа , “Уопсастыбаннай палаата уонна Ыччат министиэристибэтэ тэрийбит “Вместе — мы сила”  тэрээһиммитигэр дьон-сэргэ олус көхтөөхтүк кытынна. Устуудьуйаҕа 50-на киирии буолла. Онно сорохтор 14-түү эҥин буолан кэлбиттэрэ. Аһымал аахсыйатын кэмигэр улуустартан, тэрилтэлэртэн, биэдэмистибэлэртэн көмө хомулунна, биирдиилээн дьон куйаар куодунан киирэн, онлайн эрэсииминэн бэйэлэрин көмөлөрүн биэрдилэр.  Куйаар куодунан төһө киирбитэ икки хонугунан биллиэҕэ диэбиттэрэ. Ырыаһыттар көхтөөхтүк кытыннылар, Дьааҥыттан, Кэбээйиттэн биир дойдулаахтара өйөөтүлэр. Үөрбүтүм диэн марафону көрөн туран, көмөлөһөөрү эрийэллэриттэн. Онон халаантан эмсэҕэлээбиттэргэ туһалаах тэрээһин буолла дии саныыбын.

Бэлэмнээтэ Женни Стрюкова

Хаартыска: интэриниэт

+1
0
+1
0
+1
0
+1
0
+1
0
+1
0
+1
0