Быһа эпиир: социальнай гаастааһын, кардиология киинэ, халаан…

Ааптар: 
Бөлөххө киир:

Бүгүн “Быһаччы кэпсэтиигэ” өрөспүүбүлүкэ баһылыга Айсен Николаев кытынна. Өрөспүүбүлүкэ олохтоохторо сэргээн иһиттилэр.

Дьэ, салгыы туох туһунан Ил Дархаммыт кэпсээтэ?  Көрөөччү кардиологическай киин туһунан туоһуласта. Онуоха Айсен Сергеевич киин тутуллан бүппүтүн, билигин тестээһин эрэсииминэн туһаныллар оборудованиелары туһаныы, боруобалааһын ыытылларын эттэ.

— Бу Арассыыйаҕа олох тарбахха баттанар оборудованиелаах киин буолуоҕа. Кэмигэр хааччыммыппыт үчүгэй. Штаты сүүмэрдээһин ыытыллар. Билигин бастакы этээскэ Мэдиссиинэ киинин приемнуур отделын курдук үлэлиир. Тэрилин ситэри таҥан, үлэлэтэн баран, арыйыахпыт диэн былаанныыбыт, — диэн көрөөччүгэ анаан хоруйдаата.

“Муус чараас да буоллар…”

Тыа сирин ордук долгутар боппуруоһунан сааскы халааҥҥа бэлэмнэнии үлэтэ буолар.

— Кырдьык, Саха Өрөспүүбүлүкэтигэр халаан хаһан даҕаны чэпчэкитик ааспыта суох. Ол эрээри Саха сирэ халааны утары бэлэмнэнэр. Туһааннаах сулууспалар этэллэринэн, муус халыҥа сүрүннээн чараас соҕус. Чараас муус өрүү үчүгэй буолар диэн өйдүүр сыыһа. 2018 с. халааны өйдүүргүт буолуоҕа, муус кыра этэ. Ол эрээри Өктөмү ылбыта. Онон ыһыктынан кэбиһэр олох табыллыбат. Эстэрэр веществолары эҥин аҕалаллар.

“Кыра дохуоттаахтарга гааһы киллэриигэ көмөлөһүөхпүт”

Салгыы социальнай гаастааһын боппуруоһун таарыйда. Бу боппуруоһу тустаах штабы салайар буолан, ис иһиттэн билэрин эттэ. Хомойуох иһин, быйыл оборудование ( хочуол, турбалар эҥин) ыараабыт. Тыа сирин дьонугар төлөһөллөрүгэр ыарырҕатыахтарын сөп. Тоҕо диэтэххэ, дьиэ иһигэр үлэтин  киһи бэйэтэ төлүүр.

— Кыра дохуоттаах дьоҥҥо биллэн турар, үптэрэ-харчылара тиийиэ суоҕа. Кыра дохуоттаахтарга гаас киллэриитигэр 100-түү тыһыынча солкуобайы көрбүппүт. Бу сууманы 150 тыһ. солк. диэри улаатыннарарга былаанныыбыт. Аҥардас Дьокуускайга 650 ыалы гаастыахпыт. Холобура, Сыырдаах диэки баар СОТ-тарга  тоҕо гаас тиийбэт этэй диир буоллахха, кыамтата тиийбэт этэ. Онон аһарар кыаҕы кэҥэтиигэ үлэлиибит, — диэн сытыы кыһалҕаҕа хоруйдаата.

Бу олох сотору кэминэн буолаары турар “Муус устар” бэстибээлгэ  сыһыаннаан этэригэр туһааннаах ыччат бэстибээлэ аралдьытар-сынньатар хайысхалаах эрэ буолбакка, үөрэтэр буолуохтааҕын ыйда. Кини тэрийээччилэргэ итинник сорудаҕы туруорбут. Бу хамсааһыҥҥа 12 тыһыынча эдэр киһи кыттыаҕа. Онон ыччат сайдарыгар төһүү буолсу.

Ити курдук, өрөспүүбүлүкэ баһылыга “Быһаччы кэпсэтиигэ” кыттан, дьону долгутар ыйытыыларга хоруйдаата. Дьон-сэргэ эрэх-турах олороругар үтүө санаатын тиэртэ.

Бэлэмнээтэ Женни Стрюкова

+1
0
+1
0
+1
0
+1
0
+1
0
+1
0
+1
0