Бүгүн, бэс ыйын 20 күнүгэр, дойду бэрэсидьиэнэ Владимир Путины кытта быһа биэрии саҕаланна.
Уопсайа 1,5 мөлүйүөн ыйытыы киирбит. Бастакы ыйытыы хамнас курдук тыын боппуруостан саҕаланна. Холобур, Самара, Калининград уобаластарыгар дьон 10-15 000 солкуобай хамнаска олороллорун, итинник хамнаска тиийинэн олоруу күн-түүн сыана үрдүүр кэмигэр уустугуран иһэрин эттилэр.
«2016 сылтан дьон дохуота түспүтэ баар суол, аны хамнастарын аҥаара кирэдьиити төлүүргэ барар. Быйыл Арассыыйаҕа хамнас ааҕыллыыта 45 000 солкуобайга тиийдэ, ол эрэн хас биирдии салааҕа, ордук бырамыысыланнаска хамнас араастаһыыта улахан. Биһиги хамнас алын кээмэйин үрдэтэргэ үлэлэстибит. Холобур, байыаннай сулууспалаах дьон хамнаһын уонна биэнсийэтин быйыл үрдэтиэхпит. Национальнай бырайыактар нөҥүө экэниэмикэни сайыннардахпытына, нэһилиэнньэ дохуота үрдүөхтээх»,- диэн хоруйдаата РФ Бэрэсидьиэнэ Владимир Путин.
Ону таһынан, Смоленскай уобалас уһук нэһилиэктэригэр идэлээх быраастар тиийбэттэрин, кыра оҕону көрдөрөөрү киин куоракка оптуобуһунан хас да чаас айанныылларын эттилэр. Оттон сэбиэдиссэйдэрэ чахчы 4 быраас тиийбэтин, үөрэхтэрин саҥа бүтэрбит эдэр быраастар 25 000 солкуобайы ылалларын туһунан эттэ.
Онон, Сахабыт сиригэр уонна Арассыыйа киин куораттарыгар хамнас араастаһыыта улахана дьэҥкэтик көстөр. Өрөспүүбүлүкэҕэ быраас орто хамнаһа 120 000 солкуобай, алын таһымнаах үлэһиттэр, санитаркалар 60 000 солкуобайы ылаллар.
Арассыыйа киин уобаластарын кыра нэһилиэктэригэр хамнас кыратыттан, толору хааччыллыылаах дьиэ-уот суоҕуттан эдэр исписэлиистэр кэлбэттэрин ыйдылар. Халыҥ харчыны эккирэтэн эдэрдэр Москваҕа, Санкт-Петербурга хаала сатыыллар.
Биһиэхэ эмиэ маннык кыһалҕа баар. Дьон бары Дьокуускайга хаала сатыыр.
Онон эдэр дьону тыа сиригэр олохсутарга тустаах үлэ барыаҕа, кытыы нэһилиэктэргэ мобильнай мэдиссиинэ сайдыаҕа, «Земскэй доктор уонна биэлсэр» бырагыраама салгыы үлэлиэҕэ диэн эттэ бэрэсидьиэн. Кини Арассыыйа үрдүнэн үрүҥ халааттаах аанньаллар ортотунан 70 000 солкуобайы ылалларын чуолкайдаата.
Марианна ТЫРТЫКОВА, «Саха сирэ» хаһыат, edersaas.ru
Хаартыска: интэриниэттэн