Уус Куйга – Депутатскай хайысхатынан суол сабыллан, бу күннэргэ уматыгы тиэйии-таһыы үлэтэ тохтоон, эмиэ сыарҕа үрдүттэн олоруу балаһыанньата үөскээтэ.
Анивера Акимова, «Саха сирэ» хаһыат, edersaas.ru
«Сахаэнерго» АУо таһаҕаһы тиэйээччилэри кытары дуогабар түһэрсэн, Усуйаанаҕа 40 массыына уматыгы тиэйиигэ үлэлиэхтээх. Бүгүҥҥү туругунан, 14 тиэхиньикэ Депутатскай бөһүөлэгэр турарын туһунан хампаанньа пресс-сулууспата иһитиннэрдэ.
«Буурҕа түһэн, массыыналар сырыыларыгар харгыстар үөскээтилэр. Билигин Депутатскайтан 83-с килэмиэтиртэн саҕалаан 143-с килэмиэтиргэ диэри суол сабыллан турар. Бу саамай кутталлаах учаастак буолан, оннооҕор вездеходтар сатаан сылдьыбаттар», – диэн Усуйаанаҕа командировкаҕа сылдьар “Сахаэнерго” үлэһитэ Иван Жданов этэр.
Уус Куйгаттан Депутатскайга диэри 224 килэмиэтир. Күн-дьыл туруга этэҥҥэ эрдэҕинэ массыыналар 7 чааһынан айанныыллара. Билигин балаһыанньа хаһан көнүө биллибэт. Санатан эттэххэ, бу хайысханан тохсунньу 21 күнүттэн олунньу 16 күнүгэр диэри сырыы тохтоон турбута.
Анивера Акимова, «Саха сирэ» хаһыат, edersaas.ru