Дьокуускай куорат устун сатыы хааман иһэн, тротуар бетона онон-манан бөлтөйөн тахсыбытын бары бэлиэтии көрөбүт.
Соторутааҕыта Ленин болуоссатыгар турар бырабыыталыстыба 2 нүөмэрдээх дьиэтин таһынан ааһан иһэн, ол бөлтөгөрдөрү алдьатан, тэҥнии сылдьар оробуочайдартан туохтан маннык бөлтөйөн тахсарын ыаспыйалаан ыйыталастым.
Онуоха эдэр киһи: «Ардыгар бетон анныгар түбэспит мас үүнэн турбут чөҥөчөгө эбэтэр баҕана төрдө биһиги тымныыбытыттан өрө үтэн тахсар», — диэтэ. Ол аата сирбит, аспаалга хаайылларын сөбүлээбэккэ, араастаан тыынын таһааран эрдэҕэ диэн саныахха эмиэ сөп. Оннооҕор кутуйаҕы кутуругуттан үктээтэххэ «чыып» диир.
Ити түбэлтэттэн сир барахсан тыына хаайтарарын сөбүлээбэккэ бууннаан эрдэҕэ дии санаатым.
«БЭҔЭҺЭЭ КЭЛЭЭР!»
Бүгүн биир билэр дьахтарым манныгы кэпсээтэ. Өскөтүн күнүс эбэтэр түүн ким эрэ ааны тоҥсуйдаҕына, тиийэн ааны тэлэччи аһар кутталлаах диир. Куоракка өйдөнөр, араас куһа-ҕан дьон, халабырдьыттар баар буолуохтарын сөп. Онон куораттар күнүстэри ааны хатанан олорор үгэстээхтэр. Оттон дэриэбинэлэргэ дьон, бэйэ-бэйэлэрин кэм билсэр буоланнар, куттал суох курдук буолан, аанын күнүһүн хатаммат киһи элбэх. Билэр дьахтарым ол да буоллар ханна да буоллун, ким эрэ ааны тоҥсуйдаҕына аһыа суохтааххын диир. «Кимий?» диэн ыйытыыга хоруй суох буоллаҕына, интэриэһиргээн ааны аһар олох бобуллар эбит.
Тоҕо диэтэххэ, куһаҕан тыыннар аан аһылыннаҕына көҥүллээтилэр диэн киирэн олох-суйуохтарын сөп диир. Мин дьиэбэр кэлэн истибиппин сүөлүргүү санаан баран интэриниэти хаспытым, олоххо кырдьык да баар кыһалҕа эбит. Онон дьиэҕитигэр түүн да, күнүс да ааны тоҥсуйдахтарына ыйытан баран аһар сиэрдээх эбит. Ким да хоруйдаабатаҕына ааны аһар олох көҥүллэммэт диэн суруйаллар.
Санаан да көрдөххө, куһаҕан тыын туох аан-ньаҕа буулуоҕай! Оттон оннук хаста да тоҥсуйар, арахпат түбэлтэтигэр бэйэҕин бэйэҥ харыстыыр ньымаҕын туттуохтаах эбиккин.
Таҥараны итэҕэйээччилэр сибэтиэй уунан ааннарын ыһан харыстаналлар эбит. Эбэтэр хаста да оннук гыннахтарына «Бэҕэһээ кэлээр!» диэхтээх үһүгүн.
Надежда Логлоҕор
«Һок? Һэптиэ! Чулуу кылгас кэпсээннэр» кинигэтиттэн быһа тардан.
«Айар», 2023 с.
