Саха сирин норуоттарын спортивнай оонньууларын буулдьанан ытыыга күрэхтэһиитэ Амматааҕы элбэх хайысхалаах спортивнай саала иккис этээһигэр ыытылла турар. Дьэ, чуумпу дойду манна эбит. Бэстилиэттэр тыастара тиҥиргиир. Улаханнык саҥарарыҥ көҥүллэммэт, төлөпүөҥҥүн арааран баран киирэҕин.
Күрэхтэһии ыстаарсай судьуйата, Горнай улууһун Бэрдьигэстээхтээҕи олимпийскай эрэллэри бэлэмниир анал өрөспүүбүлүкэтээҕи оскуола ыстаарсай тириэньэрэ Николай Егоров иһитиннэрбитинэн, буулдьанан ытыыга 21 хамаандаттан 92 бэргэн ытааччы күөн көрсө сылдьар эбит. Састаап добуоччу күүстээх. Биир спорт үтүөлээх маастара, үс спорт маастара, отут маастарга кандидат күрэхтэһиини сытыырхаталлар. Ол курдук, мөлтөхтүк истэр спортсменнарга Арассыыйа сүүмэрдэммит хамаандатын чилиэннэрэ Евдокия Каторгина (Дьокуускай), Мария Егорова (Горнай), доруобай дьоҥҥо Европа чемпиона Александр Петров (Чурапчы) күрэхтэһэ сылдьаллар.
Буулдьанан ытыы күрэхтэһиитэ бүгүн саҕаланан баран, өйүүн түмүктэнэр. Чөмпүйүөннэри онно билиэхпит. Николай Афанасьевич эппитинэн, бинтиэпкэнэн ытыыга Томпо кыргыттара күүстээхтэр эбит. Ити курдук, спорт бу көрүҥэр Дьокуускай, Чурапчы, Горнай, Нам, Сунтаар хамаандалара күүстээхтэр.
Петр Павлов.