Бутуллуу- буккуллуу…
(көр-күлүү чабырҕах)
Дьэ эрэ!
Санаам сааһыланан,
Айаҕым аһыллан,
Өйүм өһүллэн ,
Саҥаран-иҥэрэн,
Кутан-симэн,
Кэпсээн-ипсээн
Киирэн бардахпына
Уо, доҕоттоор!
Тыа хаһаайыстыбатын
Туллар тутаах тэрилтэтэ
Таһаарар дьаһалларын
Тута сөрөөн көрө охсон
Хараҕар хатаан
Хас биир дьаһалын
Харса суох хаамтаран
Ханна доҕолоҥ баарын
Хостоон таһаарар.
Сыыһатын көрөн
Сыымайдаан суруйар,
Итэҕэстэрин иилэн
Иннэнэн итигэстиир.
Хаалыыта ханнатын
Харса суох хайар,
Тохтуута туоххатын
Тоһоҕолоон ыйар,
Тохтообокко туруорсар,
Кимиилээхтик киирсэр,
Бытаарыы баарын
Быһаччы бэлиэтиир,
Бокуойа суох ырытар,
Билбэттэр диэн бэрийэр,
Көрбүөччү харах буолан
Көннөрөр суоллары
Кэккэлэччи кэпсээн,
Көрүүтүн киллэрэр,
Ким баарын
Билэҕит дуо?
Бары:Эчи суох,
Кимий-кимий?
Утуйар уутун умнар,
Уйгуура бассааптыыр*
Сааһырыыга саараабат,
Сатаабаттарын сэмэлиир,
Кырдьыыга кымаардаабат.
Кимиилээхтик кимсиһэр,
Бириинчиктээн суруйан
Биири биэстэ биһэртэн
Букатын салгыбат.
Хамнаһа суох да
Хамнастааҕы
Хабахха хаайар.
Үлэлээбэт да
Үлэлээҕи үөрэтэр.
Сололооҕу саҥардыбат,
Сиэрдээхтик сэмэлиир ,
Билиитинэн бэриммэт,
Көрүүтүнэн көйгөлөппөт.
Бары: Дьэ эрэ, кэпсээн ис!
Олоҕу олоруута,
Үлэни үөтэриитэ,
Эрэйгэ эриллибитэ,
Кыһалҕаны билбитэ,
Барыта эбиллэн
Тыҥалааҕы тыыннарбат
Тэтимнээх суруксут.
Айахтааҕы атыппат
Абытай араатардьыт.
Бары: Ок-сэ! Омуннаатын!
Аны онно үөрэнэн
Ааҕааччы суохтуур.
Аҕыйах хонук
Бассаапка* биллибэтэ,
Хаһыакка көстүбэтэ,
Хайдаран бараллар.
Туох барыта үөрэх
“Тоҕо саҥарбат?”- диэн
Туоһулаһыы тута кэлэр.
Бары: Но! Дьэ эрэ!
“Кинитэ суох
Тыа хаһаайыстыбата
Туохтан тутуһарай,
Хонтуруола сүтэн
Хайдах үлэлиирэй?
Сиргэ сыһыан
Сөргүтүллүө дуу?!
Сүөһүгэ үлэ,
Сириэдийиэ дуу?!”
Айдаарбат буоллахха
Туллар тутаах тэрилтэ
Таптаабытынан дьаһайан
Оҥорон таһаарыы
Ороскуота, ночоото
Ыраас мууска ууруллан
Ааҕыллыа дуо?!
Аны дьэ кырдьык
Букатын эстэрэ дуу?!
Бары: Эс, наһаалаатын!
Иэ, оттон
Атын дьарыктаахтаахтар ,
Туспа үлэлээхтэр,
Мунаахсыйыах курдукпут…
Мунан-тэнэн барыыһыкпыт.
Хайдах-хайдах баҕайыный
Ханныгын да иннигэр
Суохтуур эбиппит,
Сатаныа суохпут…
Куһаҕан буолсукпут..
Куолу атын өттүнэн
Күөрэс гына түһүүһүк!
Ситэритин синэ биир
Суруйбутуҥ курдук суруй!
Саҥарбытыҥ курдук саҥар!
Сэмэлиириҥ курдук сэмэлээ!
Букатын тохтоомо!
Кымньыылыыр киһи
Баара ордук эбит!
Бары:Эмиэ да сөпкө этэҕин?
Үүнэри ыраланар,
Үтүөнү үксэтэр
Үлэлиири көҕүлүүр
Үчүгэйэ үтүмэн буолсу.
Мөккүөр төрүөтүн
Дьиҥ кырдьыгын,
Ис биэтэһин
Эргитэн көрдөххө
Олоҕу хамсатар
Улахан күүс буоллаҕа!.
Хайдах-хайдах баҕайыный
Сэмэлиибит дуу?!
Хайгыыбыт дуу?!
Бутуллан да бардым,
Буккуллан да хааллым.
Билии да араастаах
Буолар эбит ис дьиҥэ!
Бары: Онон дьэ! Тугу этэҕин?!
Ким таба этэрэ,
Ким сыыһа туойара
Төбөҥ хайдах быһаарара
Таһымҥыттан тутуллар
Дириҥ силистээх,
Элбэх мутуктаах
Наука эбит бэйэтэ!
Төрдүн төбөтүн
Сыныйан билэргэ
Элбэҕи аахтахха,
Үгүһү үөрэттэххэ,
Үтүмэн үлэни
Тэрийэн ыыттахха
Ис биэтэһэ биллэр
Иирбэ-таарба
Иэдээннээх үлэ эбиит…
Мөҕүрүүр мөккүөр
Майаачыта-таймата
Быһаарыллар дьыалата
Дьиҥ кырдьыга дуу,
Туос сымыйата дуу
Ир суолун ирдиир,
Тор суолун тордуур,
Баһа саллайар
Баһаам үлэ
Барыс гынар
Балысхан соруга
Буолар эбит доҕоттоор!
Бары: Чэ, оччоҕо хайдах буолабыт?
Айуу-айа!
Анал үөрэхтээхтэр
Айдаарсар
Араллааннарыгар
Адьас да
Араабыласпат
Арааһа ордуга дуу?!
Абакка саадьаҕай!
Анаарбат эрээри
Аллараа сыҥаах буолан
Айдааны тартамый…
Айманан бардамый!
Ардьаалы-аарт-татай!…
Айахтааҕы атыппат
Аны бэйэм буоллум!
Алыс наһаа барбакка
Айаҕы сабыахха,
Араатардаан бүтүөххэ!
Чурапчы Кытаанаҕын
Суон сурахтаах суруналыыһа
Тоҕус уон хаарыгар
Чугаһаан эрэр
Уйбаан Пономареву
Ураты көрүүлээх
Суруксут диэммин
Сөрү диэн сөҕөммүн
Чэбэрдик, чэгиэнник
Чэмэличчи көрөҥҥүн
Чуордук, чобуотук
Чоргуйа тур диэммин,
Чабырҕах тылынан
Чаҥыйан ыллаҕым,
Чаабыргыы түстэҕим!
Бары: Дьэ, кырдьык
Бутуллуу да
Буккуллуу….
Билиҥҥи үйэ
Бутукаай дьыалата
Буолунай буоллаҕаа!
Сэҥээрэ
(*- Meta хампаанньа WhatsApp мессенджера РФ экстремистскай тэрилтэнэн билиниллибитэ уонна үлэтэ бобуллубута)