Саха сирин быһыйдара Татьяна Бурым, Александр Корчагин Европа күрэхтэһиитигэр кыттыахтара
Ыам ыйын 10-13 күннэригэр Смоленскай куоракка мөлтөхтүк истэр спортсменнар ортолоругар чэпчэки атлетикаҕа Арассыыйаҕа бастыыр иһин күрэхтэһии буолла. Манна дойду 29 регионуттан 150 эдэр атлет күрэс былдьаста.
Саха сирин чиэһин бу күрэхтэһиигэ тириэньэр Василий Оленов иитиллээччилэрэ Николай Свинобоев, Татьяна Бурым уонна Александр Корчагин көмүскээтилэр.
Татьяна Бурым 3 000 м мэһэйдээх сүүрүүгэ (стипль-чез) биэтэккэ бастакынан кэлэн, маннык таһымнаах күрэхтэһии үс төгүллээх кыайыылааҕынан буолла. Маны сэргэ Татьяна 1 500 уонна 800 м дистанцияларга үһүс көрдөрүүлэннэ.
100 м сири Санкт-Петербург быһыйа Юрий Новиков 11.33 сөкүүндэнэн кэлэн кыайыылааҕынан буолла. Киниттэн баара-суоҕа биир суотайынан хаалан Александр Корчагиммыт үрүҥ көмүс мэтээли ылла.
Бу ситиһиилэринэн Татьяналаах Александр бэс ыйыгар Софияҕа (Болгария) буолар Европаҕа бастыыр иһин күрэхтэһиигэ кыттар Арассыыйа сүүмэрдэммит хамаандатыгар киирдилэр.
Адаптивнай спорт киинигэр буолбут пресс-кэмпириэнсийэҕэ тириэньэр Василий Оленов иитиллээччилэрэ бэйэлэрин кыахтарынан кыттыбыттарын бэлиэтээтэ.
— Барарбытыгар Дьокуускайга биэс кыраадыс этэ, оттон Смоленскай биһигини 30 кыраадыс куйааһынан көрсүбүтэ, — диэтэ тириэньэр Василий Оленов. — Аны туран, тэрийээччилэр саастарынан бөлөхтөрү холботолооннор, Николайдаах, Татьяна бэйэлэриттэн аҕа саастаахтары кытта күрэс былдьастылар. Ол үрдүнэн оҕолор куһаҕана суох бириэмэлэри көрдөрдүлэр. Николай 1 500 уонна 3 000 м үөлээннээхтэрин кытта күрэстэспитэ буоллар, тааҕы-таах бириистээх миэстэлэри ылаттыа эбит.
Александр 100 м кыһыылаахтык хотторуутун 200 м сүүрүүгэ ситиһэргэ холоммута. Ол эрэн финалга фальстартаан кэбиһэн, кырата бириистээх миэстэттэн көрө маттыбыт.
Бу күрэхтэһиигэ биһигиттэн Александр истибэттэр ортолоругар Арассыыйа спордун маастарын нуорматын бастакынан толордо. Итинэн бэйэтин аатын өрөспүүбүлүкэ спордун устуоруйатыгар суруйан хаалларда.
Арассыыйаҕа бастыыр Европаҕа кыайардааҕар уустук дииллэр. Онно сүрүн куоталаһааччыларбытынан Украина, Белоруссия спортсменнара буолаллара күүтүллэр. Финнэр эмиэ күүстээх спортсменнардаахтара биллэр.
Роман Попов, edersaas.ru