СӨ Киһи быраабыгар боломуочунайа Сардана Гурьева РФ Накаастабылы толорор федеральнай сулууспатын Саха сиринээҕи управлениетын начаалынньыга Владислав Дзюбалыын көрүстэ.
Бу дьыалабыай көрсүһүү кэмигэр Владислав Дзюба холуонньаларга уонна Дьокуускай куораттааҕы силиэстийэлиир изоляторга быһыы-майгы хайдаҕын билиһиннэрдэ. Кэпсэтии хатыылаах боробулуоха ҥөҥүө өттүгэр олорооччулар бырааптарын, доруобуйаларын харыстабылын, үлэлээх, дьарыктаах буолууларын тула барда.
Киһи быраабыгар боломуочунай бэлиэтээбитинэн, накаастабылы толорор уорганы кытта бииргэ үлэлэһэргэ туһуламмыт Сөбүлэһиигэ олоҕуран, буруйдарын боруостааччылар бырааптарын уопсастыба эмиэ хонтуруоллуоҕа. Чуолаан, СӨ Уопсастыбаннай кэтээн көрөр хамыыһыйата (ОНК).
Оттон Владислав Дзюба бу көрсүһүүгэ иһитиннэрбитинэн, өрөспүүбүлүкэ холуобунай-исполнительнай систиэмэтэ учреждениеларга материальнай-бытовой, медицинскэй усулуобуйалары сөптөөхтүк хааччыйыыга, хаайыылаахтар сокуоннай интэриэстэрин, бырааптарын тутуһууга туһуланар. Маны таһынан, буруйдарын боруостааччылар идэ ылалларыгар, үлэлээх буолууларыгар болҕомто уурулларын туһунан эттэ.
Көрсүһүү түмүгэр, управление начальнига омбудсмен, ону тэҥэ, хонтуруоллуур уорганнар көҥүллэрэ быһыллан олорооччулар бырааптарын көмүскүүргэ үлэлэригэр төһүү буолуохтарын эрэннэрдэ.
Бу туһунан РФ Накаастабылы толорор федеральнай сулууспатын Саха сиринээҕи управлениетын пресс-сулууспата иһитиннэрдэ.
Биһиги корр., «Саха сирэ» хаһыат, edersaas.ru
Хаартыска: РФ Накаастабылы толорор федеральнай сулууспатын Саха сиринээҕи управлениетын пресс-сулууспата.