Бүгүн киэһэ Олег Колесов “Бурматов сокуонугар ханнык уларытыылары киллэрэбит? диэн кэпсэтиигэ Дьокуускай баһылыга Евгений Григорьевы, Бэтэринээрийэ департаменын салайааччытын солбуйааччы Саргылана Павлованы, Ил Түмэн дьокутаата Андрей Находкины, борокуруор Альбина Постникованы кытыннарда.
Сытыы кэпсэтии буола турар. Ахсынньы 29 күнүттэн анал пууннарга 1300 ыт тутуллан турар эбит. Бэйдиэ ыттары тутарга үгүөрү үп наадатын бу кэпсэтииттэн биллибит. Өрөспүүбүлүкэ оройуоннара бэйэлэрин кыахтарынан ыттары тутууга үп көрбүттэр. Холобура, маннык үлэ Сунтаарга, Ленскэйгэ, Аммаҕа, Намҥа ыытыллыбыт.
Норуот дьокутаата Андрей Находкин эрэгийиэннэртэн талыллыбыт Гос Дуума дьокутааттара бу боппуруоһу сүрүннүүргэ күүскэ туруорсуохтаахтар диир уонна үөр ыты уопсастыба бэйэтэ үөскэтэринэн (иитэ ылан баран быраҕыы, ыты көрүүгэ эппиэтинэһэ суох сыһыаннаһыы уо.д.а) эппиэтинэһи үрдэтиэххэ диэн олох сөпкө этэр уонна кэккэ этиилэри оҥордо.
Борокуруор этэринэн, киһи биир дьиксинэрэ — ыкка ытыттарыы икки төгүл элбээбит.
Ньурбаттан Саввинов диэн киһи этиитин үгүстэр сэргээтэхтэрэ. “Бу үлүгэрдээх эмп-том сыаналаах кэмигэр үбү-харчыны ыкка көрүү диэн сөбө суох”, — диэтэ кини. “Киһи дуу, ыт дуу?” диэн этэллэрэ оруннаах курдук буолла.
Уйбаныап диэн көрөөччү ыт боппуруоһугар тоҕо Москва диэн баран олоробутуй диир. Кини ыты иитиини сүрүннүүргэ бэйэбит өрөспүүбүлүкэбит иһигэр сөптөөх быһаарыныыны ылыахха диэн эттэ диэн өйдөөтүм.
Дьэ, онон кэпсэтиини көрүҥ, сөптөөх түмүгү оҥоруҥ.
Женни Стрюкова.
Хаартыска ЯСИА ылылынна