Тыа хаһаайыстыбата

Бурдук үүнүүтэ төһө буолуоҕун сабаҕалаатылар

Агрономнар Мэҥэ Хаҥалас улууһун бааһыналарын кэрийэн, бурдук үүнүүтэ хайдах буолуон сөбүн сабаҕалаатылар.

Ааспыт нэдилэҕэ тыа хаһаайыстыбатын министиэристибэтин сиртэн үүнээйини ылыыга, мелиорацияҕа, материальнай-техническэй хааччыйыыга департаменын сүрүннүүр исписэлииһэ Марианна Бурцева улуус бааһыналарыгар сырытта. Кинини кытта тыа хаһаайыстыбатын управлениетын начаалынньыга Иннокентий Семенов, кылаабынай агроном Василий Бурнашев бааһыналар сииктэрин, температураларын мээрэйдээтилэр, гектартан быһа холуйан хас сэнтиниэр бурдук кэлиэн сөбүн сабаҕалаатылар.


Дьаҥхаады нэһилиэгин Маандай учаастагар Аркадий Попов хаһаайыстыбатын 70 гектардаах бааһынатыгар нэчимиэн «Ача» суорда ыһыллан турар, бааһына уу ыла сылдьыбатах буолан, курааннаабыт. 5
см дириҥҥэ буорун температурата 18 кыр. сылаас, сиигэ 10 см дириҥҥэ 5,2 % диэн Василий Бурнашев мээрэйдээн быһаарда. 30 гектардаах Баҕачах бааһынатын үүнүүтэ син эбит. Суорда эмиэ «Ача». 68 гектардаах Куула бааһынатыгар эбиэс «Талисман» суорда ыһыллыбыт.


Доллу нэһилиэгин сис хаһаайыстыбата ‒ «Тумул» кэпэрэтиип (салайааччыта Таисия Десяткина) 45 гектардаах Октябрь бааһынатыгар эбиэс «Фома» элиитэ суорда ыһыллыбыт.
Үүнүүтэ орто. Ардах таарыйан үүнэ сатаабыт. Гектартан 8 ц кэлэ сатыан сөп диэн сабаҕалаатылар. 111 гектардаах Күөллэрики бааһынатыгар «Фома» ыһыллан турар. Калинин 66 гектардаах бааһынатыгар сэлиэһинэй «Новосибирскай» суорда гектартан 8-9 ц биэриэн сөп курдук диэтилэр.

Майа чугаһынан Афанасий Борисов 157 гектардаах Тар бааһынатыгар сылдьан, эмиэ 8 хас сэнтиниэр кэлиэн сөп диэн сыаналааһын буолла. Манна нэчимиэн «Абалаах» элиитэ суордун ыспыттар. Мундулаахха баар 220 гектардаах бааһынаҕа ыһыллыбыт эбиэс «Талисман» суорда гектартан 8-9 ц буола сатыан сөп эбит.

Майаттан Аркадий Иннокентьев.

0
0