Быйыл саас өрөспүүбүлүкэ үрдүнэн бурдук 7 991 гектарга ыһыллыбытыттан, кураантан тэптэрэн, 259 гектар үүммэтэ, 642 гектар бурдуга оттуу хомулунна, инньэ гынан 7 тыһ. гектар бурдуга быһыллар буолла.
“Майа-МТС” хаһаайыстыба (салайааччы Афанасий Борисов) 506 гектар бааһынатыттан 600 туонна бурдугу ыларга былааннаабыт эрээри, кураан тэбэн, 200 туонна бурдук кэллэр диэн баҕалаах. Мэхэньисээтэрдэр билигин Майаттан Аллара Бэстээххэ барар суол кытыытыгар баар 150 гектардаах Тар уонна Боччугунаан бааһыналарын бурдугун быһа сылдьаллар. Маны бүтэрдэхтэринэ, Майа Мундулааҕар 240 гектардаах бааһынаҕа ыспыт нэчимиэннэригэр киириэхтээхтэр.
Өссө Сыгынньахха түөрт бааһына (барыта 200 гектар), 10 гектардаах Миитэрээски алааһын, итиэннэ Хорообукка 150 гектардаах бааһына үүнүүлэрэ хомуллуохтаах. Уон гектарга Судан отун ыспыттара, үүммэтэх. Ол биричиинэтин үөрэтэн көрөллөр. Хорообукка эбиэһи виканы кытта булкуйан ыспыттарынан «Хорообут» хаһаайыстыбаҕа анаан сиилэс, сенаж оҥоруохтаахтар.
Майаттан Аркадий Иннокентьев, «Саха сирэ» хаһыат, edersaas.ru саайтка анаан