Өлүөхүмэ улууһугар бурдугу үүннэриигэ идэтийэр биэс хаһаайыстыба баар.
Бу хаһаайыстыбалар быйыл саас бурдугу барыта холбоон 667 гектарга ыһан, судаарыстыба түһэрбит былаанын 130 % толорбуттара.
Ол курдук, «Поиск» тыа хаһаайыстыбатын кэпэрэтиибэ 300 гектарга (сэлиэһинэйи 90 гектарга, ньэчимиэни 170 гектарга, эбиэһи 40 гектарга), «Өлүөхүмэ кыладабыайа» хааччахтамыт эппиэтинэстээх тэрилтэ 209 гектарга (ньэчимиэни 71 гектарга, эбиэһи 138 гектарга), В.А. Ощепков бааһынай хаһаайыстыбата 62 гектарга (сэлиэһинэйи 16 гектарга, ньэчимиэни 20 гектарга, эбиэһи 26 гектарга), В.Г. Пермин бааһынай хаһаайыстыбата 60 гектарга (сэлиэһинэйи 15 гектарга, ньэчимиэни 30 гектарга, эбиэһи 15 гектарга), Судаарыстыбаннай сортобуой учаастак 36 гектарга (сэлиэһинэйи 7 гектарга, ньэчимиэни 17 гектарга, эбиэһи 12 гектарга) ыспыттара.
Саас бааһыналар диискэлэммит итиэннэ эминэн ыстарыллыбыт буоланнар, үүнэн эрэр куоластарга аһыҥа үөн кутталы оҥорбото. Бачча курааҥҥа улаханнык саҥарыллыбат да буоллар, ортоһуор үүнүү ылылларыгар эрэниэххэ сөп. «Өлүөхүмэ кыладабыайа» ХЭТ элбэх сүөһүлээх, улуус саамай бөдөҥ хаһаайыстыбата буолар. Айылҕа тугу биэрэрин эрэ манаабакка, үүнүүнү бааһынаттан эмиэ ыларга суоттанан, сиилэскэ анаан сыллата эбиэс ыһар идэлээх. Онон билигин бааһынатын долгуйа кэтиир…
Өлүөхүмэттэн Валерий Малышев, edersaas.ru саайтка анаан.