Арассыыйаҕа буокка саҥа ГОСТ-ун оҥордулар. “Арассыыйа хаачыстыбата. Классическай водка. Техническай усулуобуйата” ааттаах ГОСТ 2019 сылтан күүһүгэр киириэн сөп. Бу туһунан бүгүн “Известия” хаһыат иһитиннэрдэ.
edersaas.ru
Бырабыыталыстыба сорудаҕынан, буокка уонна ханньаах саҥа ГОСТ-ун оҥорууга үлэ 2015 сылтан саҕаламмыта. “Арассыыйа хаачыстыбата. Ураты ханньаахтар. Уопсай техническай усулуобуйалар” ГОСТ 2017 сыл тохсунньу 1 күнүттэн күүһүгэр киирбитэ.
Саҥа стардартынан оҥоһуллубут водка 40 кыраадыс уохтаах, сөҥүүтэ суох, дьэҥкир итиэннэ сымнаҕас амтаннаах буолуохтаах.
“ГОСТ аатыгар “Арассыыйа хаачыстыбата” диэн тыл баар. Ити бэйэ дойдутугар оҥоһуллубут итирдэр утахтар үрдүк таһымнарын, суолталарын ыйар”, — диэн Росстандарка бэлиэтээн эттилэр. Ону тэҥэ, итирдэр утаҕы оҥорооччулар, саҥа ГОСТ-у тутуспатахтарын үрдүнэн, “классическай водка” диэн тылы туттуохтарын сөбүн хаһыат суруйар.
Саҥа быраабыланан, буокка 40 кыраадыс уохтаах буолуохтаах, ол эрэн алкоголын бырыһыана 37,5-тэн 56-ҕа диэри халбаҥныан сөп. Итирдэр утаҕы оҥорууга пестицида суох сэлиэһинэй биитэр оруос итиэннэ скважинаттан ылыллыбыт сымнаҕас ыраас уу туһаныллыахтааҕын “Известия” хаһыат суруйар.
Роман Попов, “Саха сирэ” хаһыат, edersaas.ru