Ыам ыйын 6 күнүгэр Бэчээт дьиэтин таһыгар, буойун-суруналыыстар ааттара көмүс буукубанан суруллубут мемориальнай дуоска аттыгар кинилэри ахтан-санаан, сүгүрүйэн, кэриэстээн, биир мүнүүтэ саҥата суох турдулар. Буойун-суруналыыстары кэриэстээһин, пандемия хааччахтаах кэмигэр да тохтооботоҕо. Үгэс курдук, Саха сирин Суруналыыстарын сойууһа (бэрэссэдээтэл Галина Алексеевна Бочкарева) тэрийэн ыытар.
Анаабыт курдук чаҕыл күннээх, күөх халлааннаах ыам ыйын ылааҥы күнэ туран биэрдэ. Бу бэлиэ түгэҥҥэ суруналыыстар ортолоруттан тыыл бэтэрээннэрэ, сэрии кэмин оҕолоро, сэрии бэтэрээннэрин оҕолоро, сиэннэрэ кэлэн кытыннылар, аалай кыһыл гвоздикалары сүгүрүйэ, махтана уурдулар.
Аҕа дойду Улуу сэриитигэр 139 суруналыыс бөрүөнү ыстыыгынан солбуйан, биир бастакынан Ийэ дойдуларын көмүскүү аттаммыттара. Кинилэртэн 18 хорсун буойун кыргыһыы толоонуттан эргиллибэтэҕэ. Бу суруналыыстар истэригэр 1 Сэбиэскэй Сойуус Дьоруойа, 1 Социалистическай Үлэ Дьоруойа, 3 норуодунай суруйааччы, 2 бэрэпиэссэр бааллара. Суруналыыс Феодосий Донской Берлиҥҥэ тиийэн, рейхстаг истиэнэтигэр бэйэтин аатын суруйан хаалларбыта. Ону тэҥэ, суруналыыстар Сэбиэскэй Сойуус Дьоруойа Николай Кондаковынан киэн тутталлар.
Араадьыйа, хаһыат суруналыыстара тыылга да хаалан, сытыы бөрүөлэрин, саталаах санааларын, сатарыыр саҥаларын күүһүнэн дьону түмпүттэрэ, оборуона пуондатыгар үбү-харчыны хомуйбуттара, сойуомнары атыылаһан, фроҥҥа баһыылкалары ыытан, күнүстэри-түүннэри үлэлээн, Кыайыыны уһансыбыттара.
Саха сирин Суруналыыстарын сойууһун бырабылыанньатын бэрэссэдээтэлин солбуйааччы Афанасий Ноев САССР 100 сылыгар, автономнай өрөспүүбүлүкэ атаҕар турарыгар суруналыыстар оруоллара улахан диэн бэлиэтээтэ.
—Дьону-сэргэни түмэн, санааларын салайан, норуот хаһаайыстыбата, бырамыысыланнас сайдыытыгар, бөһүөлэктэр, куораттар тутуллалларыгар, бэл, Ийэ дойдуну көмүскээһиҥҥэ куруук инники күөҥҥэ сылдьыбыттара. Бу историяҕа суруллан хаалыахтаах. Онон үлэлээн ааспыт дьоҥҥо барыларыгар махтаныах тустаахпыт, — диэн кини эттэ.
СӨ инновацияҕа, цифровой сайдыыга, инфокоммуникационнай технологияларга миниистирин солбуйааччы Георгий Андреев снайпер буойуннары кэриэстээн, суруналыыстар ортолоругар сыалы ытыыга күрэхтэһии ыытыллыаҕа диэн иһитиннэрдэ.
Мустубут дьону Эстрада тыйаатырын артыыстара Василий Еремеев, Байтыкан Батаакап, Варя Аманатова патриотическай тыыннаах, өрө күүрүүлээх ырыаларынан эҕэрдэлээтилэр.
Буойун-суруналыыстар өйдөбүнньүк дуоскаларыгар Суруналыыстар сойуустарын, “Сахамедиа”, “Сахабэчээт”, “Кэскил” оҕо кыһатын салайааччылара өрүү күөх веногу уонна мустубут дьон кыһыл гвоздика сибэкки дьөрбөлөрүн уурдулар.
Ангелина Васильева, “Саха сирэ” хаһыат, edersaas.ru
Хаартыска: ааптар түһэриитэ.