Былырыын оҕо сынньанар сайыҥҥы лааҕырдара хамсыктан сылтаан үлэлээбэккэ, элбэх оҕо куорат кыбартыыраларыгар хааллан олорбуттара. Быйыл лааҕырдар үлэлииллэрэ бигэргэнэн, бу күннэргэ хомуур сүпсүлгэнэ саҕаланна.
Холобур, “Булуус уһаайбата” сайыҥҥы лааҕыр бэс ыйын 15 күнүттэн үлэтин саҕалыыра күүтүллэр. Хамсык хааччахтара билигин даҕаны бааллар, онон лааҕыр муҥутуур туолар кыаҕыттан 75% үлэлиэҕэ. Ол аата биир сменаҕа 95 оҕо сынньана тиийиэҕэ. Хаҥалас улууһун баһылыга Олег Иринеев бэҕэһээ лааҕыр үлэҕэ төһө бэлэмин хонтуруоллуу тиийэ сылдьыбыта биллэр.
“Булуус уһаайбата” Кыһыл Үрүйэ бөһүөлэк таһыгар турар. Бу сыл Үөрэҕирии уонна наука министиэристибэтин салаатынан лааҕырга муҥутуур улахан субсидия көрүллүбүтэ. Ол курдук дьиэтин-уотун сөргүтүүгэ 7 мөлүйүөн 200 тыһыынча солкуобай үп көрүллүбүтэ. Улуустааҕы оҕо эбии үөрэҕин киинин салайааччыта Василий Ильин этэринэн, быйыл лааҕыр түннүктэрин, кирилиэстэрин саҥардыы үлэтэ барыаҕа, оҕолор утуйар дьиэлэрин, олоҕу хааччыйар эбийиэктэрин өрөмүөннүөхтэрэ. Кини этэринэн, бу сезоҥҥа “Булуус уһаайбата” лааҕырга үөрэҕирии-аралдьытыы үс бырагыраамата ыытыллыаҕа: муусукаҕа үөрэтии чэрчитинэн «Music Awards» бырагыраама ыытыллар, онно ыҥырыылаах уһуйааччынан ыччакка биллэр ырыаһыт Эрхаан Попов буолуоҕа. Кинини кытта оҕолор ырыаҕа, үҥкүүгэ, тик-ток хореографияҕа, социальнай ситимҥэ видеону таҥыыга үөрэниэхтэрэ.
Иккис сезоҥҥа гитараҕа оонньуурга, английскай тылга үөрэниэхтэрэ, Журналистика академиятыттан (Москва) маастар-кылаастары ыытыахтара, блогу тэрийиигэ билии ылыахтара. “Хогвартс кистэлэҥнэрэ” диэн ааттаммыт үһүс сезоҥҥа кэлбит оҕолору үксүн английскай тыл үөрэтиитигэр угуйуохтара. “Аныгы оҕолору билиҥҥи кэм ордук ирдэнэр дьоҕурдарыгар үөрэтии барыаҕа»,- диэн кэпсээтэ Василий Ильин.
— “Булуус уһаайбатын” үгүс төрөппүт талан оҕолорун ыыталлара үөрдэр. Билигин кыра итэҕэстэри ситэрии үлэлэрэ ыытыллар. Ол эрэн, сүрүннээн лааҕыр оҕолору көрсөргө бэлэм турар, — диэтэ тургутуу түмүгүнэн Олег Иренеев.
«Саха сирэ» хаһыат, edersaas.ru
Хаартыска sakha.gov.ru