Социальнай ситимнэргэ Булуҥ улууһун баһылыгар саба түһүү туһунан сонун тарҕанна.
Ыам ыйын 24 күнүгэр 13 чаас 40 мүн. саҕана Булуҥ улууһун баһылыга Афанасий Андросов кэбиниэтигэр урут сууттана сылдьыбыт икки киһи уонна кинилэр табаарыстара (үһүөн Булуҥ улууһун олохтоохторо) киирэн, оройуоҥҥа орто уонна дьоҕус биисинэскэ үлэлиир дьону ыгар-үтүрүйэр этиилээх, улуус криминальнай түмсүүтүн өйүүрүгэр тыл көтөхпүттэр. Онуоха баһылык аккаастаабытыгар күүс өттүнэн куттуурга санаммыттар. Саба түһээччилэртэн биирдэстэрэ, бэйэтин «криминальнай аптарытыат» быһыытынан билинээччи, баһылыкка сутуругунан түспүт, ырбаахытын тырыта тыытан, үспүөйдүү охсубут. Афанасий Афанасьевич кэбиниэтигэр тахсыбыт тыаһы истээт, дьаһалта үлэһиттэрэ баһылыктарын кэбиниэтигэр сүүрэн киирбиттэр уонна айдааны тарпыт дьону тутан баран, полиция үлэһиттэрэ кэлбиттэригэр туттарбыттар. Транспортнай полиция үлэһиттэрэ айдааны тарпыт дьон кэлбит массыыналарыттан булт саатын уонна ботуруоннары булбуттар. Билигин бу үс киһини полиция тутта. Бэрэбиэркэ ыытылла турарын туһунан иһитиннэриини улуус пресс-сулууспата бэлэмнээтэ.
Булуҥ улууһун баһылыга Афанасий Андросовтан бу сонуну быһааран биэрэригэр көрдөстүбүт.
— Кырдьык, маннык түбэлтэ тахса сырытта. Мин Булуҥ улууһун Таймылыырыттан төрүттээхпин. Онон Булуҥ төрүт олохтооҕунабын. Бу дьону кытта биирдэ-иккитэ көрсөн ааспыттаахпын. Маннык быһыыланыахтарын сэрэйэн да көрбөт этим. Официальнай иһитиннэрии кэмигэр тахсара наада диэн санаалаах пресс-сулууспабар сонуну бэлэмнэппитим», — диэн баһылык санаатын тиэртэ.
Елена ПОТОЦКАЯ, «Саха сирэ» хаһыат.
Хаартыска — «Маяк Арктики» хаһыаттан.