Бүгүн Булуҥ улууһун олохтоохторугар куйаар ситиминэн ситэриилээх былаас отчуота буолла.
Суолталаах тэрээһини СӨ нэһилиэнньэ олоҕор куттала суох буолууну хааччыйар судаарыстыбаннай кэмитиэт салайааччыта Дмитрий Лепчиков салайан ыытта.
Улуус ыраах сытар нэһилиэктэрин олохтоохторо «полярнай» түүнүнэн сибээстээн, бөртөлүөттэр сырыылара өр кэмҥэ тохтотулларын, онон айан сырыыта харгыстанарын бэлиэтээтилэр уонна бу кыһалҕаны туоратыыга туох үлэ ыытылларын туоһуластылар.
СӨ Салгын тырааныспарыгар дэпэртээмэнин салайааччыта Ольга Алексеева быһаарбытынан, федеральнай авиационнай быраабылаҕа олоҕуран, түүҥҥү кэмҥэ анал сигналы биэрэр сырдатар тэриллэрдээх эрэ вертодромнарга уонна авиабылаһааккаларга көтүү оҥоһуллара көҥүллэнэр.
— Быйылгы сылга 25 мөлүйүөн солкуобай авиационнай былаһааккалары өрөмүөннүүргэ уонна анал тэриллэринэн хааччыйыыга көрүлүннэ. Субсидия муниципальнай тэриллии эбии үбүлээһини оҥордоҕуна бэриллэр. Ол кэнниттэн сайаапка түһэриитин докумуоннарын толоруу саҕаланыаҕа. Онон кулун тутарга муниципальнай тэриллиилэр бу үлэҕэ олохтоохтук ылсыахтара, — диэн иһитиннэрдэ Ольга Алексеева.
Елена ПОТОЦКАЯ, “Саха сирэ” хаһыат, edersaas.ru
Хаартыска — ааптар уонна СИА.