Хас биирдии булчут булт көҥүлүн ыларга сайаапканы хайдах биэрэр туһунан билиэн баҕарар. 2021 сыл муус устар 1 күнүттэн бэс ыйын 30 күнүгэр диэри булт көҥүлүн ыларга сайаапканы саҥардыллыбыт халыыбынан биэриэххэ сөп. Туундара кыыл табатыттан уонна киистэн уратыга сэрэбиэй бырахсыы (жеребьёвка) көрүҥүнэн бултуур нуорма олохтонор буолла. Бу туһунан сиһилии “Саха сирэ” хаһыакка ааҕыҥ.
САЙААПКАНЫ ХАЙДАХ ТОЛОРОБУТ?
Сайаапканы биэрэргэ бу түһүмэхтэри тутуһар наада:
1. Сайаапканы бу сыл муус устар 1 күнүттэн бэс ыйын 30-гар диэри СӨ судаарыстыбаннай уонна муниципальнай өҥөтүн e-yakutia порталыгар «Заявления на участие в жеребьёвке по распределению разрешений на добычу охотничьих ресурсов, в отношении которых устанавливается лимит их добычи» түһүмэххэ киирэн толороҕут.
2. Ыйыы быһыытынан, сайаапкаҕа булт билиэтин дааннайдара, туох булка көҥүл ылыаххытын баҕараргыт, бултуу барар сиргит аата (муниципальнай оройуоҥҥа көҥүллэнэр, маассабай булка туһуламмыт сирдэр), булка көҥүл биэрбит тэрилтэ (СӨ Айылҕа харыстабылын министиэристибэтин территориальнай тэрилтэтин аата-суола) ыйыллар.
3. Булчут муниципальнай оройуон сиригэр-уотугар булт биир көрүҥэр көҥүл ылар, бултуур нуорматын суруйтарар бырааптаах;
4. Электроннай сэрэбиэйгэ кыттаргытыгар судаарыстыбаннай өҥө порталыгар бигэргэммит учуокка киирбит буолуохтааххыт.
“Учуот запиһын” 4 араас көрүҥүнэн бигэргэтиэххэ сөп:
— баан килийиэнэ буоллаххытына, онлайн-баан нөҥүө;
— пааспаргытын уонна СНИЛС-кытын илдьэ өҥө киинигэр (центр обслуживания) тиийиэххитин сөп;
— Арассыыйа буостатыттан лиичинэһи бигэргэтэр коду сакаастыаххытын син;
— электроннай илии баттааһыны туһанан (квалификациялаах илии баттааһыны (КЭП) эбэтэр универсальнай электроннай каартаны (УЭК) туһаныаххытын сөп).
Бүтүн Аан дойду үрдүнэн буола турар уустук быһыынан-маҥнайгынан, харантыынынан сибээстээн, ЕСИА сорох өҥө тэрилтэлэрэ сабыллан тураллар, сорохторо үлэлиир туспа болдьоммут кэмнээхтэр. Ол курдук, харантыын кэмигэр МФЦ базатыгар үлэлии турбут ЕСИА өҥө киинэ сабыллыбыта («Мои документы» офистара үлэлиир кэмнэрин туһунан билигин тоҕоостоох иһитиннэриини mfcsakha.ru саайтка киирэн көрүҥ). Онтон дьаһалта уонна атын муниципальнай тэрилтэлэр базаларыгар үлэлиир ЕСИА көрөр-истэр кииннэригэр эрдэттэн суруттаран баран тиийэргит наада (сиһилии эрийэн ыйыталаһыҥ). ЕСИА көрөр-истэр кииннэрин толору испииһэгин уонна сибээстэһэр нүөмэри https://map.gosuslugi.ru/co каартаҕа киирэн көрүҥ.
Өскөтүн судаарыстыбаннай өҥө порталыгар “учуот запиһа” суох уонна интэриниэккэ кыайан холбонор кыаххыт суох буоллаҕына, сайаапкаҕытын олорор сиргитигэр (оройуоҥҥутугар) баар СӨ Айылҕа харыстыбалын министиэристибэтин тэрилтэтигэр үөһэ этиллибит ирдэбиллэри тутуһан биэриэххитин син.
От ыйын 1 күнүттэн икки үлэ күнүн иһигэр булт көрүҥүнэн уонна оройуоннарынан аттарыллан сайаапка биэрбиттэр испииһэктэрэ оҥоһуллуоҕа. Испииһэк СӨ Айылҕатын харыстабылын официальнай саайтыгар тахсыаҕа.
Сэрэбиэйдэһии булт нуормата уонна квотата бигэргэммитин иккис күнүгэр оҥоһуллуоҕа. Манна СӨ Айылҕатын харыстабылын министиэристибэтиттэн уонна булчуттар, балыксыттар уопсастыбаннай түмсүүлэриттэн бэрэстэбиитэллэр баар буолуохтара, хонтуруоллуохтара. Электроннай генераторы («генератор случайных чисел») туһанан хапсыбыт дьону быһаарыахтара.
Сэрэбиэйдэһии хайдах ыытыллыбытын Айылҕа харыстабылын официальнай саайтыгар аһаҕастык көрдөрүөхтэрэ. Бүтэрин саҕана сайаапка биэрбит хас биирдии киһиэхэ тус кэбиниэтигэр түмүгү ыытыахтара. Булт сөбүлэҥэр хапсыбыт түгэннэригэр СӨ судаарыстыбаннай, муниципальнай өҥө
порталын нөҥүө уонна да атын сокуонунан мэктиэлэнэр көрүҥнэринэн атырдьах ыйын 1 күнүттэн саҕалаан, салгыы көрөн барыахтара.
edersaas.ru