Саха сирин үгүс улуустарыгар булт сокуонугар уларытыыны киллэриигэ кэпсэтии бара турар. Холобур, бүгүн, олунньу 11 күнүгэр, Мэҥэ Хаҥалас улууһун баһылыга Николай Старостин Ил Түмэн сиргэ сыһыаннаһыыга, айылҕа ресурсаларыгар уонна экологияҕа сис кэмитиэтин бэрэссэдээтэлэ Сахамин Афанасьевтыын уонна Ил Түмэн тыа сиригэр уонна аграрнай бэлиитикэҕэ сис кэмитиэтин бэрэссэдээтэлэ Андрей Находкинныын көрсөн, улууска ити боппуруоска туох үлэни тэрийэн эрэллэрин туһунан кэпсээтэ, санаа атастаста.
Көрсүһүү кэнниттэн Ил Түмэн тыа сиригэр уонна аграрнай бэлиитикэҕэ сис кэмитиэтин бэрэссэдээтэлэ Андрей Находкин: «Биир дойдулаахтарым мэҥэ хаҥаластар бултуур сирдэрин улуустарыгар тэрийбит булт уопсастыбаларыгар хаалларалларын туһунан Ил Түмэн сис кэмитиэтин бэрэссэдээтэлэ Сахамин Афанасьевка кэпсээтилэр. Улуустарыгар баар булт уопсастыбатынан аукциоҥҥа кыттан, нэһилиэнньэ бултууругар сөптөөх усулуобуйаны тэрийэргэ былааннаналлар эбит. Бу — сөптөөх быһаарыныы буолар. Улуус баһылыга Николай Старостин ити боппуруоска туох үлэ бара турарын сиһилии быһааран биэрдэ. Онон атын улуустар эмиэ итинник тэриниэхтэрин наада. Оччоҕуна эрэ, сокуоннар уларыйа турар кэмнэригэр, улуус булчуттарын интэриэстэрин көмүскүөхтэрэ”, — диэн санаатын үллэһиннэ.
Санатар буоллахха, бу нэдиэлэ саҥатыгар Ил Түмэн сиргэ сыһыаннаһыыга, айылҕа ресурсаларыгар уонна экологияҕа сис кэмитиэтин көҕүлээһининэн, видеокэмпириэнсийэ нөҥүө «Саха Өрөспүүбүлүкэтигэр бултуур сирдэри тыырыы, туһаныы уонна харыстааһын исхиэмэтин барылын туһунан» диэн “төгүрүк остуол” буолбута. Онно норуот дьокутааттара, улуустар баһылыктара, уопсастыбаннай түмсүүлэр салайааччылара кыттыбыттара. Ол туһунан “Саха сирэ” хаһыат кэлэр нүөмэригэр сиһилии билиһиннэриэхпит.
Александр Тарасов, «Саха сирэ».