Булгунньахтаах бэртээхэй мини-пааркаланна

Ааптар: Эдэр Саас

Бөлөххө киир:

Булгунньахтаахха скейт-былаһааккалаах саҥа мини-паарка баар буолла.

Хаҥалас улууһугар булгунньахтаахтар «Уһук Илиҥҥэ 1000 тиэргэн» бырагырааманан мини-пааркаланнылар. Манна эргиччи элбэх кыбартыыралаах дьиэлэр тураллар эрээри, тиэргэннэр оҥоһуктара суоҕа. Онуоха бу сир-уот оҥоһуллуор, тупсарыллыар диэри манна ким да аахайан сылдьыбат этэ. Арай, сүрүннээн, ыам ыйын 9 күнүгэр аналлаах тэрээһиннэр ыытыллаллара, олохтоохтор бир дойдулаахтарын буойуттар пааматынньыктарыгар сибэкки дьөрбөтө уураллара. Арчы дьиэтигэр араас тэрээһин буолара. Улахан сиргэ эргэ былаһаакка баара: биир дьиэ уонна сырылыы оонньуур сир. Саас манна хайыһардааччылар диэн иһитиннэриигэ суруллар.

Олохтоохтор бу сири тупсаран оҥорорго бука бары сөбүлэспиттэр. Бу сири кинилэр сэлиэнньэ сүрэҕэ диэн ааттыыллар эбит. Дьэ, аны билигин, манна бука барыларыгар анаммыт тиэргэн баар буолбут. Билигин бу мини-пааркаҕа сатыы дьон хаамар сирэ уонна бэлисипиэтинэн сылдьар сир баар. Ону сэргэ үс зоналаах: скейт-былаһаакка, воркаут-зона (сэрээккэлиир, дьарыктанар сир) уонна хаачыстыбалаах тэриллэринэн оҥоһуллубут оҕо оонньуур былаһаакката. Мини-паарка дьон-сэргэ сөбүлээн сылдьар сиринэн буолбута бэлиэтэнэр.

— Өскөтүн манна урут элбээбитэ 4-6 оҕо кэлэн оонньуур эбит буоллаҕына, билигин дьон толору. Оҕолорбут бары скейтаннылар уонна самокаттаннылар. Өссө ханнык ордугун быһаарсар буоллулар, — диэбит Булгунньахтаах баһылыга Айталина Васильева. — Манна дьиэ кэргэнинэн, кэлээскэҕэ кыра оҕолорун олордубут ийэлэр, аҕам саастаахтар астына-дуоһуйа сынньана кэлэр буоллулар. Хаалыктаах хаамаллар уонна сэрээккэлииллэр. Бары наһаа үөрэллэр, астыналлар.

Паарка бырайыага улахан, 80 мөл. кэриҥэ суумалаах. Онон тутан үлэҕэ киллэрии түһүмэхтэринэн ыытыллар. Быйыл «Уһук Илиҥҥэ 1000 тиэргэн» бырагырааманан 7 мөл.солк. суумалаах үлэ бастакы түһүмэҕэ тутуллан киирбит.

Манна төгүрүк быһыылар уонна булгунньах курдук оҥоһуулар сэлиэнньэ аатын бигэргэтэн биэрэллэр. Оттон эрийэ-буруйа барар суоллар Өлүөнэ эбэни көрдөрөллөр. Маны сэргэ, араас өҥнөр туһаныллыбыттара болҕомтону тардаллар. Холобур, хара өҥнөөх оонньуур газон диэн быһаарыллар.

Мини-паарка ситэриллибит-хоторуллубут көрүҥнэнэригэр, дьаһалта спонсор быһыытынан «Якутцемент» ААУо (ген.дириэктэр Мамедов Алиш Забид-оглы) кытыннарбыт. Спонсор көрбүт үбүнэн-харчытынан быйыл уотунан-күөһүнэн сырдатыы ыытыллыбыт, паарка уонна аттыгар баар футболлуур сир күрүөлэрэ кырааскаламмыттар. Ураты көрүҥнээх киирэр аан LETO компетенция киинин бэлэмнээһининэн тупсарыллыбыт.

Санатан эттэххэ, Саха сиригэр быйыл элбэх тиэргэн тупсарыллар. «Уһук Илиҥҥэ 1000 тиэргэн» бырагырааманан, уопсайа 37 куоракка уонна сэлиэнньэҕэ 124 тиэргэни уонна мини-паарканы тупсаран оҥоруу үлэлэрэ ыытыллаллар. Итинтэн 75 өрөспүүбүлүкэбит киинигэр. Муниципальнай тэриллиилэргэ 49 территорияҕа сакаасчытынан СӨ Ил Дархан архитектураҕа уонна куораты тутууга управлениета буолар. 2022 сылга бырагырааманы олоххо киллэрэргэ көрүллүбүт үп уопсай кээмэйэ 846,00 мөл. солк.

«LETO» компетенция киинин саайтыттан ылылынна.

Хаартыскаларга Никита Федоров түһэриитэ.