Булчут күнүгэр булчут ыттар эмиэ күннүүллэр. Дьокуускайга ыты эһэҕэ тургутан көрүүгэ ыытыллыбыт өрөспүүбүлүкэтээҕи тохсус күрэхтэһиигэ 21 хамаанда кытынна. Хамаандаҕа түөрт ыт, ол иһигэр биир тыһы ыт баар буолуохтаах. Барыта 116 лайка киирбититтэн 32 ыты биирдиилээн бастыыр иһин күрэхтэһиигэ кытыннардылар.
Василий НИКИФОРОВ, «Саха сирэ» хаһыат, edersaas.ru
Эһэҕэ биирдиилээн киириигэ «Кыымаан» хамаандаттан (Дьокуускай) Балу барыларыттан чорбойон, 2-с дипломунан бэлиэтэннэ. Ханыылаһан үрүүгэ «Чурапчы-4» хамаандаттан Кырсалаах Моойто аатырдылар.
Хамаанданан түмүгү таһаарыыга М.Н.Черкашин хапытааннаах «Мэҥэ-4» хамаанда кыайыылааҕынан тахсан, предприниматель Г.Н.Жирков убаһатынан бириэмийэлэннэ. Иккис миэстэни эмиэ Мэҥэ Хаҥаластан А.Н.Тастыгин хапытааннаах хамаанда ылан, Якутохотрыболовсойуус туруорбут аргыстаах GPS моойторугун тутта. Үһүс миэстэлээх Е.Е.Борисов «Борисовтар» хамаандата (Дьокуускай) предприниматель Г.А.Осипов «Сайга» карабинын хаһаайына буолла.
Маны тэҥэ булчут лайка ыттар быыстапкаларыгар 174 ыты үс боруодаҕа арааран, миэстэлэрин быһаардылар. Саха булчут лайката боруода быһыытынан бигэргэнэ илик эрээри, сыл аайы туспа куоталаһыннараллар. Саастаахтар бөлөхтөрүгэр бастаабыт Доҕор (хаһаайына – Н.Н.Герасимов, Дьокуускай) «Саха сирин лайката – 2017» өрөспүүбүлүкэтээҕи XI быыстапка муҥутуур кыайыылааҕынан ааттанна.
Василий НИКИФОРОВ, «Саха сирэ» хаһыат, edersaas.ru