Саха Өрөспүүбүлүкэтигэр Булчут күнэ 2012 сыллаахха Ил Дархан Ыйааҕынан муус устар ый бастакы субуотатыгар олохтоммута. Ол күн быйыл 7-кэ түбэһэр. Ити эрээри, тэрийээччилэр бүгүҥҥүттэн дьаһаллары саҕалаатылар.
Онон бүгүн, муус устар 4 күнүгэр, киэһэлик 3 чаастан икки чаас устата Айылҕа харыстабылын министиэристибэтин мунньахтыыр саалатыгар булчут ыттаахтарга анаан семинар ыытыллыа. Сарсын, муус устар 5 күнүгэр, Дьокуускай куоракка Тутуу ырыынагар “Саха сиригэр булт уонна туризм” дьаарбаҥка-быыстапка арыллан, үс күнү быһа үлэлиэ. Маны сэргэ “Охота и рыбалка в Якутии” теле-биэрии “Сезон удачи” куонкуруһугар кыттар дьон фото-быыстапкалара туруоруллуо. Хомсомуол болуоссатыгар сарсыарда 11 чаастан булчут боруодалаах ыттарга быыстапка тэриллэн, киэһэ 5 чааска кыайыылаахтары биһириэхтэрэ. Быйылгы тэрээһин уратыта – ууттан куһу таһааран биэрэр, сааһыкка үгүрүөнү ыттарар эҥин курдук кэлии, омук боруода ыттар эмиэ кыттыахтара.
Муус устар 6 күнүн сарсыардатыгар Мэҥэ Хаҥалас Майатын Ураһалаах алааһыгар “Байанай” булчуттар өрөспүүбүлүкэ таһымнаах күрэхтэһиилэрэ саҕаланыа уонна сарсыныгар Дьокуускайга үс сиринэн салгыы ыытыллыа. Бу күн Маҕанныыр айан суолун 4-с биэрэстэтигэр “Байанай” эрчийэр-тургутар станцияҕа булчут лаайка ыттары эһэҕэ тургутуохтара. Маны таһынан Айылҕа харыстабылын министиэристибэтин мунньахтыыр саалатыгар күнүскү чэйтэн киэһэ түүлээх кыылы бултааһыны сайыннарыы туһунан кэпсэтиэхтэрэ.
Булчут күнүнээҕи тэрээһиннэр муус устар 7 күнүгэр түмүктэниэхтэрэ. Ол курдук, “Байанай” күрэхтэһиигэ кыттар хамаандалар кыраҕы харахтаах ытааччылара хара сарсыардаттан буулдьа уонна доруоп сааларга ким бэргэнин быһаарсыахтара. Булчут лаайкалары эһэҕэ тургутуу иккис күнүн салҕанан, сирэй уонна хамаанданан бастаабыттары, миэстэлэспиттэри киэһэ 5 чааска наҕараадалыахтара. “Саха сиригэр булт уонна туризм” дьаарбаҥка-быыстапка түмүгэ күнүс 2 чааска таһаарыллан, кыайыылаахтарга бириистэри туттарыахтара. Өрүү буоларыныы, Арчы дьиэтигэр “Булчут сэһэнэ” көрүү-күөн күрэс сарсыардаттан саҕаланан, киэһэ түмүктэниэ. Булчут күнүн түмүктүүр улахан дьаһал Саха тыйаатырыгар киэһэ 6 чаастан ыытыллыа. Манна уһулуччу ситиһиилээх дьоҥҥо Ил Дархан бириэмийэлэрин, күрэхтэһии, күөн күрэс кыайыылаахтарыгар бириистэри туттарыахтара.
Василий НИКИФОРОВ, «Саха сирэ» хаһыат, edersaas.ru