Дьокуускай куорат 5 №-дээх оскуолатыгар бэҕэһээҥиттэн “Будущий дипломат-2018” уон иккис төгүлүн ыытыллар өрөспүүбүлүкэтээҕи куонкурус түмүктүүр этаба саҕаланна. Бу туһунан СӨ тас сибээскэ департаменын пресс-сулууспата иһитиннэрдэ.
Быйылгы куонкурус үбүлүөйдээх тэрээһиннэргэ, ол иһигэр СӨ тас сибээскэ миниистиринэн, Монголияҕа РФ генеральнай консулунан үлэлээбит А.В.Мигалкин төрөөбүтэ 60 сылыгар анаммыт.
Куонкурус түмүк күрэһигэр 16 улуустан 47 үөрэнээччи киирбит. Икки лиганан арахсан, икки күн устатыгар норуоттар икки ардыларынааҕы тиэмэҕэ, омук тылыгар билиилэрин-көрүүлэрин, эссены көмүскээһиҥҥэ, дебатка тургутууну ааһыахтаахтар. Ол түмүгүнэн муҥутуур кыайыылаах быһаарыллар. Кыайыылаахтары эҕэрдэлээһин кулун тутар 24 күнүгэр “Россия – моя история” Историческай паркаҕа буолуохтаах.
Долгутуулаах күрэскэ кытта кэлбит оҕолору Арассыыйа тас сибээскэ министиэристибэтин бэрэстэбиитэлэ Н.В. Дьяконов, СӨ тас сибээскэ департаменын салайааччы В.Н. Васильев, СӨ үөрэх уонна наука миниистирин бастакы солбуйааччы Ф.В. Габышева, «Юные якутяне» киин дириэктэрэ М.П. Петрова эҕэрдэлээбиттэр.
Биһиги корр., “Саха сирэ” хаһыат, edersaas.ru