Анна Егоровна Павлова, үлэ бэтэрээнэ, 1998-2004 сс. Бэс Күөлүгэр оҕо саадын сэбиэдиссэйэ:
—Биһиги нэһилиэккэ хаһан да буолбатах иэдээн ааҥнаата. Дьоммут дьиэлэрэ-уоттара аҕыйах чаас иһигэр күл-көмөр буолла, олохторун тухары муспут баайдара-дуоллара күдэҥҥэ көттө, аҥардас бэйэлэрэ эрэ туран хааллылар. Хара хоруонан көмүллүбүт дэриэбинэбитин көрөр олус ыарахан этэ.
Араас дьон биһиги туспутунан арааһы суруйаллар, араас тылы тарҕаталлар. Ол эрээри биһиги нэһилиэк дьоно бүгүн бары биир санаанан салайтаран олоробут: “Бу ыарахан кэмҥэ биһиги соҕотох буолбатахпыт”. Төрөөбүт өрөспүүбүлүкэбит салалтатын, бары дьонун-сэргэтин биир түмсүүлээх көмөлөрө көхсүбүт кыараан олорор кэмигэр биһиэхэ эрэли сахпыта, улаханнык долгуппута. Хаһан да көрбөтөх, билбэтэх дьоннорбутуттан көмө билигин даҕаны киирэ турар.
Ил Дархаммыт Айсен Николаев биһиги иэдээммитин чугастык ылынан дойдубут салалтатын иннигэр нэһилиэккэ саҥа оскуола, култуура-успуорт киинэ тутулларын туруорсубутун уонна бу этиитэ ылыныллыбытын илэ-чахчы көрбүппүт. Ол ыарахан кэмҥэ биһиги итинтэн олус үөрбүппүт: ол аата нэһилиэк чөлүгэр түһэриллэр буолла уонна салгыы сайдар кыахтанна диэн.
Биһиги нэһилиэкпит улууска бастыҥнар ахсааннарыгар сылдьар. Бэс Күөлгэ барыга дьоҕурдаах үтүө үлэһит дьон олоролллор. Республика бастыҥ үлэлээх оскуолата, олус үчүгэй оҕо саада эмиэ биһиэхэ бааллар. Онон төһө да ыаллар олохторо аймаммытын иһин, бар дьоммут көмөтүнэн сыыйа олохпутун булунан, салгыы нус-хас олох, үлэ-хамнас саҕаланарыгар эрэлбит улахан.
Татьяна ПАВЛОВА, «Саха сирэ» хаһыат, edersaas.ru саайтка анаан