Сүрүн Уопсастыба

Бу түүн Саха сирин олохтоохторо Ый быыстаан өлүүтүн кэтээн көрүөхтэрин сөп



Атырдьах ыйын 8 күнэ үүнэр түүнүгэр, олохтоох бириэмэнэн 02:24 чаастан 04:19 чааска диэри Саха сирин олохтоохторо, халлаан былытынан сабыллыбатаҕына, Ый быыстаан өлүүтүн кэтээн көрүөхтэрин сөп. Бу кэмҥэ Ый түөрт гыммыт биирэ Сир хотугу өттүн күлүгэр киириэҕэ.

edersaas.ru


Куйаар эттиктэрин үөрэтээччилэр интернет араас таһаарыыларыгар иһитиннэрбиттэринэн, айылҕа бу биир дьикти көстүүтүн Чукоткаттан уонна Камчаткаттан ураты дойду бары олохтоохторо туох да эбии тэрилэ суох кэтээн көрүөхтэрин сөп. Ый быыстаан өлүүтэ Арассыыйа арҕааҥҥы уонна соҕуруулуу-арҕааҥҥы оройуоннарыттан ураты сирдэргэ үчүгэйдик көстүөҕэ диэн буолар. Саха сирин киин улуустарыгар бу көстүүнү былыты сэргэ ойуур баһаардарын буруолара мэһэйдиэхтэрин сөп.

Кэлэр Ый өлүүтэ 2018 сыл тохсунньу 31 күнүгэр буолуоҕа.

Манна даҕатан эттэххэ, 2017 сыл атырдьах ыйын 21 күнүгэр Күн толору өлүүтэ буолуоҕа. Ити көстүүнү номнуо “Америкатааҕы улуу хараарыынан” сүрэхтээтилэр. Ол эбэтэр, Америка Холбоһуктаах Штаттара тэриллиэхтэриттэн, 1776 сылтан, Америка континеныгар бу бастакы Күн өлүүтэ. Айылҕа маннык көстүүтүн билиҥҥи АХШ сиригэр-уотугар олорбут дьон тиһэҕин 1257 сыл бэс ыйын 13 күнүгэр көрбүттэрэ үһү. Атырдьах ыйын 21 күнүгэр американецтарга Күн толору өлүүтэ ытыска уурбуттуу көстүөҕэ. Оттон Арассыыйа олохтоохторо айылҕа дьиктитин көрөр кыахтан матыахтара, арай, дойду уһук хотугулуу-илиҥҥи өттүгэр уонна Чукоткаҕа эрэ Күн өлүүтүн сорох кэрдииһин кэтээн көрүөххэ сөп буолуо.

Роман ПОПОВ, “Саха сирэ” хаһыат, edersaas.ru

1
0

Санааҕын суруй