Бэлиитикэ Маны аах Нацбырайыактар

Бу сылга национальнай бырайыактарынан 25 эбийиэк тутулла турар

СӨ Бырабыыталыстыбатын бэрэссэдээтэлэ Андрей Тарасенко министиэристибэлэр салайааччыларын уонна өрөспүүбүлүкэ вице-премьердэрин кытта мунньахха национальнай бырайыагынан тутуллар турар эбийиэктэр олоххо киириилэрин тула кэпсэттэ.

Быйыл национальнай бырайыактарынан өрөспүүбүлүкэбитигэр 25 эбийиэк уонна 2 эбийиэги чөлүгэр түһэрии үлэтэ барар. Ол иһигэр Уус Алдаҥҥа, Аммаҕа, Намҥа, Өлүөхүмэҕэ, Хаҥаласка, Тааттаҕа уонна Дьокуускайга барыта алта оскуола уонна аҕыс уһуйаан, Өлүөхүмэҕэ, Бүлүүгэ, Дьокуускайга үс доруобуйа харыстабылын уонна социальнай өҥө дьиэтэ, Намҥа уонна Бүлүүгэ култуура кииннэрэ, Уус Алдаҥҥа икки успуорт киинэ тутулла турар. «Экология» нацбырайыагынан алта эбийиэк тутуллар.

2021 сылга Саха сиригэр 11 национальнай бырайыак чэрчитинэн 44 эрэгийиэннээҕи бырайыак олоххо киирэрэ былааннанар.

Мунньах кыттыылаахтара «Доруобуйа харыстабыла», «Демография», «Үөрэхтээһин», «Куттала суох уонна хаачыстыбалаах суоллар», «Экология», «Олорор сир», «Үлэ уонна үлэлээх буолууну өйөөһүн», «Дьоҕус уонна орто урбаан», «Цифровой экэниэмикэ», «Култуура» нацбырайыактарынан туох үлэ ыытылларын, тэрээһиннэри, былааннары ырыттылар.

Бу сылга 2 737 хантараак баттанара былааннанар, онтон бүгүҥҥү күн туругунан 1 732-тэ баттаммыт.

Ил Дархан уонна Бырабыыталыстыба пресс-сулууспата.

0
0