Саха сиригэр “Куттала суох уонна хаачыстыбалаах суоллар” национальнай бырайыак чэрчитинэн, бу сыл бүтүөр диэри 269,34 км суол оҥоһуллан киириэҕэ, ол иһигэр 221,08 км – өрөспүүбүлүкэ иһинээҕи, 48,26 км – Дьокуускай куорат иһинээҕи суоллар.
— Федеральнай уонна эрэгийиэннээҕи суолталаах, массыына айанныыр хаачыстыбалаах суолларын уонна муосталары тутуу дьон олоҕун хаачыстыбатын лаппа тупсарыа, экэниэмикэ уонна бырамыысыланнас сайдыытын түргэтэтиэ, биисинэскэ саҥа кыахтары арыйыа, — диэн Ил Дархан Айсен Николаев бэлиэтээтэ.
Киин куоракка суолу оҥорооччулар өссө алтынньыга быйылгы былааннарын 100% толорбуттара. Эрэгийиэннээҕи суолларга 207,22 км оҥоһуллубута, сыл бүтүөр диэри өссө 13,86 км оҥоһуллара хаалла.
Дьокуускайга эргийэ барар шоссе хапытаалынай өрөмүөннэннэ, Эргэ Покровскайдыыр тракт, Иван Кульбертинов уулуссата оҥоһулуннулар. Табаҕа, Тулагы бөһүөлэктэригэр элбэх оҕолоох ыаллар кыбаарталларыгар тиэрдэр суоллар оҥоһулуннулар.
Бу күһүҥҥүттэн Дьокуускай хорук тымыра – Ленин проспегын өрөмүөнэ саҕаланна. Үс түһүмэҕинэн баран, үлэ 2023 сылга түмүктэниэхтээх.
Нам суолугар Сыырдаах-Тулагы учаастага 4,16 км уһуннаах аспаалынан бүрүлүннэ, Аппааны-Хатырык икки ардыгар 18,5 км аспаалланна. “Умнас” суолга 20,50 км, Хатас суолугар 4,87 км аспаалынан бүрүлүннэ. Ону тэҥэ, Амма, Анаабыр, Дьааҥы, Мүрү, Бөтүҥ, Уолба-Булуҥ, Харбалаах, Өймөкөөн суолларыгар эмиэ аспаал уурулунна.
Ону тэҥэ, муосталар эмиэ оҥоһуллаллар. Уус Майа оройуонугар Ааллаах Үүн үрэҕи, Томпоҕо Мөҥкүлэ үрэҕи, Ленскэйгэ Ньүүйэ үрэҕи туоруурга муосталар оҥоһулуннулар.
Ангелина Васильева, “Саха сирэ” хаһыат, edersaas.ru
Хаартыска: sakhagov.ru