Таатта улууһун Кыйытыгар «Үөрэхтээһин» национальнай бырайыак чэрчитинэн 90 миэстэлээх оскуола тутуллар. Саҥа эбийиэк бу сыл бүтүүтэ, ахсынньыга, үлэҕэ киирэрэ былааннанар. Бу туһунан СӨ Тутууга министиэристибэтин пресс-сулууспата иһитиннэрэр.
Тутааччы «Монтажник» тэрилтэ барыта 2 757 кв. м. иэннээх икки этээстээх эбийиэги тута сылдьар. Үөрэх тэрилтэтэ икки блокка араарылынна: бастакыта — алын кылаастар, мастарыскыай, лабораториялар, медкабинет уонна ас блога, иккиһэ — салалта, үөрэнэр кабинеттар, успуорт уонна актовай саалалар. Оскуоланы тулалыыр сири-уоту эмиэ силигин ситэриэхтэрэ. Манна сүүрэр суол, турниктар, успуорт былаһаакката баар буолуоҕа.
Тутуу үлэтэ кыраапыктан хаалбакка бара турар. Бүгүҥҥү күҥҥэ эргэ оскуоланы көтүрүү үлэтэ түмүктэннэ. Саҥа оскуола дьиэтэ турда, тутааччылар фасадын, вентиляцияны, кирилиэстэри оҥоро сылдьаллар.
Ааспыт сылга «Үөрэхтээһин» национальнай бырайыагынан Мэҥэ Хаҥалас Балыктааҕар 150 миэстэлээх оскуола уонна Дьокуускайга 31-с №-дээх оскуолаҕа эбии тутуу үлэҕэ киирбитэ. Быйыл Нам улууһун Кириэс Кытылыгар 220 үөрэнээччигэ анаммыт оскуоланы уонна интэринээти, Уус Алдан Огородтааҕар 220 үөрэнээччигэ анаммыт оскуоланы уонна Хаҥалас Өктөмүгэр 220 уонна 100 миэстэлээх оскуола-саады туталлара былааннанар.