Саха сиринээҕи тыа хаһаайыстыбатын судаарыстыбаннай академиятын «Арктикатааҕы агротехнологическай университет» диэн уларытан ааттыыр туһунан Арассыыйа Тыатын хаһаайыстыбатын министиэристибэтин дьаһала тахсыбытынан, Ил Дархан Айсен Николаев бүгүн соцситимҥэ маннык суруйда:
edersaas.ru
Саха судаарыстыбаннай тыа хаһаайыстыбатын академиятын кэлэктиибин уонна устудьуоннарын саҥа үрдүк таһымҥа тахсыбыккытынан —— Арассыыйа Тыатын хаһаайыстыбатын министиэристибэтин быһаарыытынан, «Арктика судаарыстыбаннай агротехнологическай университета» диэн ааттаммыккытынан эҕэрдэлиибин!
Академия 1956 сылтан, СГУ-га тыа хаһаайыстыбатын факультета аһыллыаҕыттан, сайдыы уһун сыллаах суолун ааста. Бу кэм устатыгар аан дойду Уһук хотугу түбэтигэр анал үрдүк үөрэхтээх исписэлиистэри бэлэмнээн таһаарар кыһа буола үүннэ. Тыйыс айылҕалаах, экстремальнай килиимэттээх дойдуга хотугу үгэс буолбут төрүт салаалары сайыннарыыга наукаҕа тирэҕирии, аныгы технологиянан сэбилэммит тыһыынчанан үрдүк таһымнаах идэтийбит исписэлиистэри иитэн таһаарыы – бу барыта биһиги академиябыт ситиһиитэ буолар.
Ааспыт сыл ахсынньытыгар Арассыыйа тыатын хаһаайыстыбатын миниистирин солбуйааччы М.И.Увайдовка ыытыллыбыт сүбэ мунньахха Саха судаарыстыбаннай тыа хаһаайыстыбатын академиятын сайдыытын стратегията дьүүллэһиллибитэ. Кулун тутар 19 күнүгэр мин миниистир Дмитрий Николаевич Патрушевка академияны университекка уларытар туһунан хадаатайыстыбаны ыыппытым. Оттон бүгүн – ССТХА Арктикатааҕы судаарыстыбаннай агротехнологическай университет буолла!
Бастатан туран, бу биһиги өрөспүүбүлүкэбитигэр тыа хаһаайыстыбатын исписэлиистэрин бэлэмниир анал үөрэх кыһата үрдүк хаачыстыбалаахтык үлэлиирин сыаналааһын уонна салгыы үлэлиирэ наадатын билинии буолар. Анал үрдүк үөрэх кыһатын саҥа статуһа биллэн турар, исписэлиистэри аныгы таһымынан бэлэмнээһин хайысхалара кэҥэтиллэрин көрдөрөр. Билигин кини иннигэр Арктика аграрнай үөрэҕин аан дойду таһымнаах киинэ буолар сорук турар. Ол соругу профессорскай-преподавательскай састаап толоруо диэн эрэнэбин. Үрдүк аатынан өссө төгүл эҕэрдэлиибин итиэннэ үөрэххэ, наукаҕа, үрдүк таһымнаах каадырдары иитиигэ саҥа үрдэллэри, ситиһиилэри баҕарабын.
Айсен Николаев,
Саха Өрөспүүбүлүкэтин Ил Дархана.
«Саха сирэ» хаһыат, edersaas.ru.