Өрөспүүбүлүкэтээҕи оперативнай ыстаап иһитиннэрбитинэн, сыстыганнаах дьаҥ ордук дьон маассабай мустуутун кэнниттэн өрө турар.
Улуустарга, куораттарга дьону мунньар тэрээһиннэр билигин да тохтоло ыытылла тураллар. Ол курдук, ааспыт сууккаҕа Анаабыр улууһугар — 10, Бүлүү улууһугар — 8 киһи сыстыганнаах дьаҥҥа сутуллубута билиннэ. Бу улуустарга Ил Дархан ыйаахтарыгар этиллибит быраабылалар тутуһуллубаттарыттан уонна кэһиллибиттэриттэн таҕыста. Кэлиҥҥи кэмҥэ балыыһаҕа киирбит дьон үгүстэрэ — урууларга уонна үбүлүөйдэргэ сылдьан баран сутуллубут дьон. Ордук саастаах дьон ыалдьара үксээтэ. Онон бу өрөбүллэргэ, атын да кэмҥэ былааннаммыт көрсүһүүлэргэ, тэрээһиннэргэ сылдьыыны тохтотуохха наада. Билигин да киинэ тыйаатырдарыгар, үбүлүөйдэргэ, урууларга туох да сэрэҕэ сылдьыы үксээтэ. Оттон ыарыы дьон мустан сириттэн күөдьүйэн тахсар. Саамай кутталлаах кэмҥэ элбэх киһилээх сиргэ сылдьыыттан сэрэниэххэ!
Елена ПОТОЦКАЯ, «Саха сирэ» хаһыат, edersaas.ru