Бу өрөбүллэргэ «Ас-үөл— 2019» быыстапка-дьаарбаҥка буолар!
Хас сыл ахсын баччаларга, хомуур үлэтэ үмүрүйүүтэ, долгуйар Дьокуускай куоракка Хомсомуол болуоссатыгар тыа хаһаайыстыбатын табаарын оҥорооччулар өрөспүүбүлүкэтээҕи «Ас-үөл» быыстапка-дьаарбаҥкалара тэриллэр үгэстээх.
edersaas.ru.
Бырагыраама киэҥ
Быйылгы быыстапка-дьаарбаҥка бу өрөбүллэргэ, ол эбэтэр балаҕан ыйын 28-29 күннэригэр буолуоҕа. Онно улуустартан чааһынай, бааһынай хаһаайыстыбалар, тыа хаһаайыстыбатын кэпэрэтииптэрэ, астыыр-таҥастыыр тэрилтэлэр уонна өрөспүүбүлүкэ бөдөҥ хампаанньалара бэйэлэрэ оҥорон таһаарбыт бородууксуйаларын: үүт-эт астарын, балыктарын, бурдук оҥоһуктарын, мүөттэрин, чэйдэрин, оҕуруоттарын аһын, о.д.а. аҕалыахтара. Хаһан да буоларын курдук, быыстапка-дьаарбаҥка бырагыраамата киэҥ. Ол курдук, балаҕан ыйын 27 күнүгэр тэриллэр сүбэ мунньахха тыа хаһаайыстыбатын улуустардааҕы управлениеларын уонна астыыр-таҥастыыр кэпэрэтииптэрин үлэһиттэрэ быйылгы сыл аҕыс ыйдаах үлэлэрин түмүгүн уонна инники соруктарын туһунан дьүүллэһиэхтэрэ.
Балаҕан ыйын 28 күнүгэр күнүс 1 чаастан Хомсомуол болуоссатын киин сыанатыгар быыстапка-дьаарбаҥканы үөрүүлээхтик аһыы сиэрэ-туома толоруллуоҕа. Бу күн күнүс 3 чаастан Саха судаарыстыбаннай тыа хаһаайыстыбатын академиятын ипподромугар Тыа хаһаайыстыбатын министиэристибэтин бирииһигэр ат сүүрүүтэ тэриллиэҕэ. Туруоруллубт бириистэр бииртэн биир үчүгэйдэр: тэлэбиисэртэн, холодильниктан, ювелирнай салон сэртипикээтиттэн саҕалаан, “SOKOL_YKT» вездеходка, СКС-харабыыҥҥа тиийэ бааллар.
Балаҕан ыйын 29 күнүгэр Тыа хаһаайыстыбатын министиэристибэтин тиэргэнигэр тэриллибит «Өрөбүл күн дьаарбаҥкаларын» латарыайалара оонньонуохтара. Санатан эттэххэ, ити латарыайалар 500 солкуобайтан элбэх сууммалаах аһы-үөлү атыыласпыт дьоҥҥо бохсо бэриллибиттэрэ. Бириистэр эмиэ бииртэн биир бэртэр, оттон саамай сүрүн бирииһи харбаабыт бааттаах тарбахтаах убаһа хаһаайына буолуоҕа! Бу икки күн устатыгар Хомсомуол болуоссатын сыанатыгар улуустартан уус-уран самодеятельность кыттыылаахтара, саха эстрадатын сулустара уонна аграрнай үөрэх кыһаларын устудьуоннара кыттыылаах кэнсиэрдэр буолуохтара.
Икки туонна аһы-үөлү бэлэмнээтибит
Маннык түһүлгэлэргэ хаһаайыстыбалар бородууксуйаларын киэҥ эйгэҕэ таһаарар, батарар ырыынактарын кэҥэтэр, итиэннэ хардарыта уопут атастаһан, сайдыыга саҥа суоллары тобулар буоланнар, кыттааччы ахсаана сыллата үксээн иһэр. Онон, быйылгы быыстапка-дьаарбаҥкаҕа кыттарга баҕаларын биллэрэн, сүүрбэ биир улуустан 138 тэрилтэ, хаһаайыстыба сайаапка түһэрдилэр.
Ыраах Өлүөхүмэ улууһуттан «Өлүөхүмэ кыладабыайа» ХЭУо кэлиэхтээх. Ол туһунан хаһаайыстыба генеральнай дириэктэрэ Николай Ефимов-Владимиров маннык кэпсиир:
– Саха сирин кииниттэн төһө даҕаны ыраах олордорбут, биһиги өрөспүүбүлүкэтээҕи «Ас-үөл» быыстапка-дьаарбаҥкаҕа сыллата көхтөөхтүк кыттабыт, итиэннэ бэйэтин салаабытыгар биһирэнэн, салгыы Бүтүн Арассыыйатааҕы быыстапкаларга кыттабыт. Кэлиҥҥи үс сыллаах ситиһиибитин билиһиннэрдэххэ, «Өлүөхүмэтээҕи», «Пошехонскай», «Адыгейскай» диэн сыырдарбыт, отонтон астаабыт барыанньабыт уонна джеммит, «Славянскай» суораппыт Саха сирин уонна Арассыыйа бастыҥ табаардарын кэккэлэригэр киллэриллибиттэрэ. Москваҕа Норуот хаһаайыстыбатын ситиһиитин быыстапкатыгар тэриллибит Бүтүн Арассыыйатааҕы «Көмүс күһүн» быыстапка-дьаарбаҥкаҕа 2016 сыллаахха кыһыл көмүс, 2018 сыллаахха үрүҥ көмүс мэтээллэринэн наҕараадаламмыппыт.
Быйылгы быыстапка-дьаарбаҥкаҕа анаан, икки туонна кэриҥэ сыыры, арыыны, үрүҥ аһы уонна сир аһын бэлэмнээтибит. Даҕатан эттэххэ, быйыл саас «Туймаада» ҮАПК агрохолдиҥҥа киирдибит. Бу биһиги үлэбитин-хамнаспытын кэҥэтэрбитигэр, бородууксуйабытын батарыыга саҥа эйгэҕэ тахсарбытыгар, материальнай-тиэхиньиичэскэй базабытын хаҥатар бырагыраамаларга кыттарбытыгар, итиэннэ күндү Өлүөхүмэбит аатын-суолун дьоһуннук өрө тутарбытыгар тирэх буолуоҕа.
Киин куорат олохтоохторо уонна ыалдьыттара! Балаҕан ыйын 28-29 күннэригэр Хомсомуол болуоссатыгар быыстапка-дьаарбаҥкаҕа кэлэҥҥит, тыа сирин чэрдээх үлэһит дьоно оҥорон таһаарбыт, экология өттүнэн ыраас, иҥэмтэлээх үрүҥ астарын, эмис эттэрин, хамсыы сылдьар балыктарын, сибиэһэй хортуоппуйдарын, оҕуруоттарын аһын сөбүгэр сыанаҕа атыылаһаҥҥыт, кыстыыр аскытын-үөлгүтүн хааччынаргытыгар, итиэннэ бу күннэргэ эһиэхэ эрэ анаан тэриллэр оонньууларга көхтөөхтүк кыттаргытыгар ыҥырабыт.
Раиса Сибирякова, «Саха сирэ» хаһыат, edersaas.ru.