Оҕону эмиий үүтүнэн аһатыы уонна доруобай аһылык VI Бүтүн аан дойдутааҕы нэдиэлэтэ Саха сиригэр бүгүҥҥүттэн, алтынньы 23 күнүттэн, саҕаланна.
edersaas.ru
Ийэ өрөспүүбүлүкэтээҕи күнүн чэрчитинэн ыытыллар нэдиэлэ устата эмиий үүтүн харыстааһын, ийэлэр уонна оҕолор доруобай аһылыктарын хааччыйыы уо.д.а. боппуруостарга лиэксийэлэр, семинардар, «төгүрүк остуоллар», куонкурустар ыытыллыахтара.
Медицина национальнай киинин уонна Дьокуускайдааҕы клиническэй балыыһа оҕо төрөтөр отделениеларыттан оҕолонон тахсар ийэлэри үөрүүлээх быһыыга-майгыга чиэстиэхтэрэ.
«Оҕоҕо үтүө санаалаах балыыһа» Доруобуйа харыстабылын Бүтүн аан дойдутааҕы тэрилтэтэ (ВОЗ) иҥэрэр үрдүк аатыгар кэккэ балыыһалар аттестацияны ааһыахтара.
Алтынньы 26 күнүгэр Өрөспүүбүлүкэтээҕи медиа-кииҥҥэ Доруобуйа харыстабылын Бүтүн аан дойдутааҕы тэрилтэтэ уонна Арассыыйа сүрүннүүр исписэлиистэрэ кыттыылаах пресс-конференция ыытыллыаҕа.
ВОЗ Европатааҕы офиһын салайааччы Dr. JoaoBreda Кулаковскай уул. 42 дьиэтигэр ыытар лиэксийэтэ сыстыгана суох ыарыылары, уойууну сэрэтиигэ ананыаҕа.
Алтынньы 27 күнүгэр 14.00-17.00 ч. ийэ уонна оҕо доруобай аһылыгар научнай-үөрэтэр-методическай үлэлэри билиһиннэрэр быыстапка Бырабыыталыстыба 2 №-дээх дьиэтигэр буолуоҕа. Онтон 17.00-19.00 чч. «Тыгын Дархан» эрэстэрээҥҥэ олохтоох оҥорон таһаарааччылар астарын боруобалааһын тэриллиэҕэ.
Бу күн «Оҕолорго үтүө санаалаах балыыһа» аттестация түмүктэрэ таһаарыллыахтара.
Надежда ЕГОРОВА, «Саха сирэ» хаһыат, edersaas.ru