Тохсунньу 11 күнүгэр өрөспүүбүлүкэҕэ 2200 устуука коронавируснай инфекцияны утары вакцина кэлбит. Бу туһунан суһал ыстаап салайааччытын солбуйааччы Ольга Балабкина иһитиннэрдэ.
Бу иннинэ кэлбит вакцина барыта, сүрүннээн Дьокуускайга, толору туһаныллыбыт. Оттон бу нэдиэлэ бүтүүтэ өссө 22 тыһыынча устуука “Спутник V” диэн Арассыыйаҕа оҥоһуллубут вакцина кэлэрэ күүтүллэр. Мантан сүрүннээн бырамыысыланнай оройуоннарга уонна атын улуустарга тарҕатыахтара.
Онон, бастатан туран, элбэх киһини кытары быһаччы алтыһан үлэлиир дьон, учууталлар, миэдиктэр, социальнай эйгэ, быраабы харыстыыр уорганнар үлэһиттэрэ олорор сирдэринэн сыһыарыллыбыт поликлиникаларга баран, быһыыны босхо ылалларыгар ыҥыраллар. Уочарат суох буоларын туһугар, ыйыллыбыт бириэмэҕэ хойутааһына суох тиийиллиэхтээх.
Коронавирустан быһыыны хат уонна оҕону эмтэрэ сылдьар дьахталлар, эмкэ аллергиялаах дьон ылыа суохтаахтар. Миэдик ону ыйыталаһан эрэ баран, быһыыны биэриэхтээх. Атыттартан уратыта диэн бу вакцинаны туруоруу үлэлээх, чааһы быһа биэрэллэр. Онтон 21 хонон баран, хайаан да иккис быһыытын ылыахтааххын, оччоҕо эрэ көдьүүстээх буолар.
Улахан тэрилтэлэр кэлэктиибинэн сайаапка түһэрдэхтэринэ, вакцинаны тымныыга харайар усулуобуйалаах эрэ буоллахтарына, миэдиктэр онно тиийэн биэриэхтэрин сөп.
Ангелина Васильева, “Саха сирэ” хаһыат, edersaas.ru
Хаартыска: интэриниэттэн