Украинаҕа быһыы-майгы уустугуран, тохсунньу 26 күнүгэр дуоллар 80, евро 90 солк. диэри үрдээбит. РБК эргиэнинэн дьарыктанааччылар ортолоругар валюталар халбаҥнааһыннара ас-үөл сыаната үрдүүрүгэр-үрдээбитигэр ыйытык оҥорбут.
Санатар буоллахха, бу күннэргэ Эмиэрикэ Судаарыстыбаннай дэпэртээмэнэ биир дойдулаахтарын Украинаттан тэскилээҥ диэн эппитин кэнниттэн дуоллар 80, евро 90 солк. үрдээтэ. 13 үлэ күнүн иһинэн Арассыыйаҕа Киин баанын куурсугар дуоллар уонна евро 5 % чэпчээтэ. Эспиэртэр бу уларыйыынан сибээстээн, тастан киирэр оҕуруот аһын уонна фрукта сыаналара үрдүүрүгэр дьайыа диэн тойонноотулар.
Арассыыйаҕа үүннэриллибэт, ол эбэтэр тастан киирэр оҕуруот аһа уонна фрукта сыаналара үрдүүрэ чуолкай. Холобур, олорго лимон, апельсин, уо. д. а. цитрусовайдар киирэллэр. Ону тэҥэ, чеснок 90 %-нын Кытайтан аҕалаллар. Эспиэрдэр быһааралларынан, дуоллар хамсааһыныттан ити этиллибит бородуукталар сыаналара тута уларыйар-тэлэрийэр. Онон кэккэ бородуукталарга бу күннэргэ сыана үрдүүрэ күүтүллэр. Оттон хортуоппуй, сөбүөкүлэ уонна моркуоп сыаналара үрдүө суоҕа, тоҕо диэтэххэ, Арассыыйа ааспыт сайыннааҕы хасааһын билигин туһана олорор.
Аһыы утах сыаната үрдүө дуо? РБК суруйарынан евро кууруһа 90 солк. кирбиини ааспатаҕына, үрдүө суоҕа диэн быһаарар. Тастан киирэр аһыы утаҕынан эргинээччи Simple Group хампаанньа бэрэсидьиэнэ Максим Каширин валюталар туруктара аһыы утах сыанатыгар оннук айылаах дьайыыны оҥорботтор диэн быһаарар. Ол эрээри, евро аһара бардаҕына, биллэн турар, сыана үрдээһинигэр тиэрдиэ диэн сабаҕалыыр.