Бүгүн сарсыарда 11:00 ч. Тымныы Полюһугар — Өймөкөөҥҥө Польша аатырбыт спортсмена Валерьян Романовски туохха да, кимҥэ да аралдьыйбакка эрэ, соҕотоҕун 48 чаас устата бэлисипиэтинэн тохтообокко сүүрдэн, Гиннесс рекордун олохтуурга турунна.
Елена ПОТОЦКАЯ, «Саха сирэ» хаһыат, www.edersaas.ru
Өймөкөөҥҥө аан дойдуга 5 рекорду олохтообут спортсмен туох-ханнык балаһыанньаҕа рекорд олохтуу сылдьарын туһунан Валерьян Романовски көмөлөһөөччүтэ Вавжинец Куцтуун маннык кэпсэттибит:
— Киһигит тымныыны төһө тулуйарый?
— Бу чааска экстремал-велосипедист тохтообокко сүүрдэ сылдьар. Күнүс — 30 кыраадыс тымныы этэ. Түүн – 40 кыраадыс тымныы буолуохтаах. Халлаан сылыйан биэрбитин, биһиги хайыыр да кыахпыт суох. Дьиҥэр Польшаҕа Ягеллонскай университет анал ангаарыгар 60-ча кыраадыс тымныы усулуобуйаҕа бэлэмнэммиппит. Онно таҥна сылдьар таҥаспытын, бэлисипиэт камераларын бэрэбиэркэлээбиппит. Бастаан утаа тоҥор курдук этибит да, кэлин эппит-хааммыт үөрэнэн барбыта.
— Валерьяны тугунан аһатаҕыт?
— Мүөттээх лапса, балык миинэ, эттээх ириис, блины, таба этин миинэ…
— Таба этин даа?
— Тамара Егоровна бэркэ астаан аһатар. Төлөпүөнү киниэхэ биэриим. Бэйэтэ кэпсээтин…
Салгыы урбаанньыт Тамара Васильеваны кытта кэпсэтэбит:
— Таба этин миинин иһэрдэр эбиккин дуу?
— Оо, доҕоор, астара бүтүннүү кэнсиэрбэ. Маннык суолталаах соруктаах дьону сахалыы сиэринэн көрсүбэккэ. Астарын сибиэһэй аһынан солбуйдум. Киһибит икки аҥаар чаас буола-буола аһын кыратык хабыалаат, тахсан салгыы бэлисипиэттии барар. Сойумуон наада быһылаах.
… Вавжинец Куц этэринэн, Гиннесс рекордун олохтоот, поляктар төттөрү айанныахтаахтар. “Бу өрөбүлгэ куоракка тиийиэхпит. Тамара Егоровна ыалдьыта да элбэҕэ бэрт эбит. Манна билигин Кытай туристара бааллар. Сарсын аны Германияттан кэлэллэр үһү. Биһиги иннибитинэ эмиэ бэрт элбэх турист кэлэн барбыт. Онон хонор миэстэ былдьаһык”, — диэн кэпсиир экстремал-спортсмен көмөлөһөөччүтэ.
Сарсыҥҥы балаһыанньаны кини салгыы билиһиннэриэх буолан, бүгүҥҥү кэпсэтиибитин түмүктээтибит.
Елена ПОТОЦКАЯ, «Саха сирэ» хаһыат, www.edersaas.ru