Дьокуускайга түмүктэммит VIII Норуоттар икки ардыларынааҕы киинэ бэстибээлигэр «Көрөөччүлэр биһирэбиллэрэ» номинация кыайыылаахтара быһаарылыннылар! «Бастыҥ дьахтар оруола» ааты «Мин аатым Таптал» киинэ сүрүн дьоруойа Татьяна Легантьева ылары ситистэ. Оттон «Бастыҥ эр киһи оруола» наҕарааданы «Триумф» киинэҕэ олимпиец Александр Иванов оруолун иһин Дьулусхан Андросов тутта.
Кыайыылаахтар бириэмийэни туттулар, көрөөччүлэргэ махтаннылар уонна «Эдэр саас» ааҕааччыларыгар анаан санааларын кытта үллэһиннилэр.
«Көрөөччүтэ суох артыыс суох»
Татьяна Легантьева, «Бастыҥ дьахтар оруола» номинация кыайыылааҕа:
— Ахсыс киинэ бэстибээлэ түмүктэннэ. Номинацияҕа киирбит буоламмын, олус уһун, долгутуулаах күннэр аастылар. Бу интэриниэт нөҥүө куоластааһын сүүрүктээх үрэҕи туоруур курдук эбит: тимирэн ыла-ыла үөһэ тахсыы, инники-кэнники түсүһүү… Хас сарсыарда аайы аймахтарбыт социальнай ситимнэр бөлөхтөрө «Үтүө сарсыарданан!» диэн эҕэрдэ оннугар «Эдэр саас» саайтын сигэтиттэн саҕаланар этэ: «Куоластыырбытын умнубаппыт!» диэн.
Хата, бэстибээл бүтэн, аны саҥа сонуннар, оҕолорбут хаартыскалара кэлэр буолуллар. Бу күннэргэ дьонноохпун-сэргэлээхпин, көрөөччүлээхпин диэн өссө төгүл бигэтик итэҕэйдим. Халыҥ аймахтарбар – Ленскэйдэргэ, Чурапчыларга, Үөһээ Бүлүүлэргэ, доҕотторбор, доҕотторум доҕотторугар, доҕотторум доҕотторун доҕотторугар, түөрт оҕом иитээччилэригэр, учууталларыгар – барыларыгар муҥура суох махтанабын!
Уонна, биллэн турар, режиссербар Валентин Макаровка махталым улахан. «Мин аатым Таптал» киинэҕэ оруол биэрэн, 5 сыл оҕо көрөн дьиэҕэ олорон, идэбиттэн, үлэбиттэн, көрөөччүбүттэн тэйэ сылдьыбыт кэммэр, идэм суолугар төнүннэрдэ. Махтал, Валентин, артыыс Легантьеваны умнубаккар!
Кырдьык, көрөөччүтэ суох артыыс суох. Идэтигэр үлэтэ суох артыыс эмиэ суох. Мин туспар ыалдьыбыт, куоластаабыт дьоҥҥо бэйэм уонна ийэм аатыттан ис сүрэхпиттэн өссө төгүл улахан махтал!
«Сыралаах үлэ сыаналанар»
Дьулусхан Андросов, «Бастыҥ эр киһи оруола» номинация кыайыылааҕа:
— Бары чугас дьоммор, доҕотторбор уонна, биллэн турар, көрөөччүлэрбэр улахан махтал! Куоластааһын диэн, кырдьыга, олус ыарахан эбит. Этэргэ дылы, киинэни көрбөтөх да дьон ааһан иһэн куоластаан кэбиһиэн сөп дии. Ол иһин бастаан улаханнык ылымматаҕым. Ол эрээри, толкуйдаан көрдөххө, бу куоластааһын баар буолан, бэстибээл туһунан өссө элбэх киһи биллэ, саха киинэтэ бары өттүттэн ааттанна. Аны кэлэр сылтан дьүүллүүр сүбэ наадатын эмиэ өйдөөтүбүт быһыылаах. Хата, төһө да көрөөччү куоластааһына буолбутун иһин, барыта кырдьыгынан, тоҕоостооҕунан буолла. Убайбар Иннокентий Луковцевка хотторбутум да буоллар, эмиэ сөпкө дии санаабыт буолуом. Тус бэйэм Татьяна Легантьева туһугар олус күүскэ ыалдьыбытым. Дьолго, иккиэн кыайдыбыт! Аны күһүн иккиэн оонньообут «Айхал» диэн киинэбит күн сирин көрүөҕэ.
Саамай улахан махталым – тапталлаах кэргэммэр! Кини киинэ уһуллуоҕуттан бу бүгүҥҥү күҥҥэ диэри миэхэ саамай күүстээх өйөбүлүм буолла. Кини баар буолан, бэйэбэр эбии эрэнэн, бу сыралаах үлэбин санаан, күрэххэ кыттарга быһаарыммытым. Бу кыайыым эдэр көлүөнэҕэ холобур буоллун – сыралаах үлэ уонна бэрээдэк хайаан да сыаналанар уонна үтүө түмүккэ тиэрдэр!
Бу кыайыылар – саха киинэтэ сайдан иһэрин, артыыстарбыт сыралаах үлэлэрэ сыаналанарын уонна талааннара чаҕылхайын дакаастабыла. Артыыстарбыт аан дойдуга саха киинэтин ааттатар буоланнар, кинилэргэ эппиэтинэс эмиэ үрдүк. Инникитин да саҥа, чаҕылхай оруолларынан көрөөччүлэрин үөрдэ туруохтара диэн эрэнэбит.
Алина Диодорова, ХИФУ устудьуона